“ЁШЛАР ВА ЖАМИЯТ” АКЦИЯСИ

Ўзбекистон Қизил Ярим Ой Жамияти томонидан амалга оширилаётган “Ёшлар фаоллиги ва волонтёрликни ривожлантириш” халқаро лойиҳаси доирасида  Ўзбекистон Қизил ярим ой жамияти Халқаро Қизил Хоч ва Қизил Ярим Ой Жамиятлари Федерацияси кўмагида Бухоро вилояти ташкилоти томонидан “Ёшлар ва жамият” акцияси ташкил этилди. Бухоро туманидаги 16-умумтаълим мактабида ўтказилган тадбирда вилоятдаги 53 та мактаб ўқувчилари ва ўқитувчилари иштирок этди.

Тадбирнинг очилишида сўзга чиққан Ўзбекистон ҚЯОЖ вилоят ташкилоти раиси Ш. Ихтиёрова ҳар қандай жамоат ташкилотида кўнгиллиларнинг асосий қисмини ёшлар ташкил қилади. Уларнинг Ўзбекистондаги кўнгиллилар ҳаракатининг мақсад ва вазифалари, “Куч – бирликда” шиори остида бирлашиб, инсонпарварлик ва ватанпарварлик ғояларини тарғиб қилишлари зарурлиги ҳақида сўз юритилди. Жамиятнинг вазифаси эса ёшлар билан фавқулодда вазиятларда қандай ҳаракат қилишни ўрганиш, жабрланганларга биринчи тиббий ёрдам кўрсатиш ва соғлом турмуш тарзини тарғиб қилиш бўйича ишларни кучайтиришдан иборат.

Тадбир аввалида вилоят ташкилоти ходими Д.Бобоева иштирокчиларга Халқаро Қизил Хоч ва Қизил Ярим Ой Ҳаракати, унинг тарихи ва тузилиши, шунингдек, 1949-йилдаги Женева конвенциясининг асосий қоидалари ҳақида батафсил маълумот берди. Ўзбекистон Қизил ярим ой жамияти фаолияти ҳақидаги ҳикоя ҳам катта қизиқиш уйғотди.

Биринчи ёрдамни биласизми? Вилоят миқёсидаги тренер ва ҳудудий ташкилот ходими Н.Егамов тадбирнинг ўқув бўлимини ана шу савол билан бошлади. Фавқулодда вазиятда қандай ҳаракат қилиш, жабрланувчига биринчи тиббий ёрдам кўрсатиш, жабрланувчини фалокат зонасидан олиб чиқиш ва уни тикланиш ҳолатига қайтариш, шунингдек, юрак-ўпка реанимациясини амалга оширишда қандай йўл тутиш кераклиги ҳақида болалар билан батафсил ўқув машғулоти ўтказди. Вилоят Фавқулодда вазиятлар бошқармаси мутахассиси Ф.Саидов эса кўргазмали қуроллар ёрдамида ёнғинни ўчиришда қўлланиладиган техника воситалари ва ёнғинга қарши чоралар асосларини кўрсатиб берди.

 Шунингдек, шу куни Бухоро шаҳридаги 19-мактабнинг республика кўрик-танловида совриндор бўлган ўқувчиларидан ташкил топган “Ёш қутқарувчи” гуруҳининг 5 дақиқалик кўргазмали чиқиш ўтказиб, чодир тикиш йўлларини намунали кўрсатишди.

Якунда вилоятдаги барча санитария бригадалари ва санитар постлар раҳбарларига 10 турдаги гигиена воситаларидан иборат санитар пакетлар ҳамда Жамият вилоят ташкилотининг ташаккурномалари топширилди.