05 Yan 2024
НАМАНГАНДА ҲАЙРИЯ ТАДБИРЛАРИ
Ўтган йил охирида Чуст шаҳридаги туман шифохонасига бир қанча мактабгача таълим ва таълим муассасаларидан 328 нафар бола ётқизилган эди. Касалхонада ётоқхона ва чойшаблар етишмасди. Ушбу ҳолатни инобатга олган Қизил ярим ой жамияти Наманган вилояти ташкилоти шифохонага инсонпарварлик ёрдами кўрсатишга қарор қилди ва қуйидагилар совға сифатида тақдим этилди: матраслар – 30 дона, ёстиқлар – 30 дона, чойшаблар – 30 дона, бир марталик шприцлар (10 г) – 500 дона, вена ичига юбориш учун бир марталик тизимлар – 500 дона.
Шунингдек, жамиятнинг Наманган ташкилоти томонидан вилоят қон қуйиш маркази биносида “Қон – ҳаёт” шиори остида хайрия-маърифий тадбири ўтказилди.
Тадбирда иштирокчиларга Ўзбекистон Республикасининг “Қон ва унинг таркибий қисмлари тўғрисида”ги қонунининг мазмун-моҳияти, донор қонининг аҳамияти, унинг хавфсизлигини таъминлаш бўйича ташкилий чора-тадбирлар, донорлик турлари, қон гуруҳлари ва резус фактори ҳақида маълумот берилди. Шунингдек, видеоролик намойиш этилди, донорлик ҳаракатини тарғиб қилувчи плакатлар ва брошюралар тарқатилди.
Тадбир сўнгида 36 нафар кўнгилли ўз қонини топширди ва уларга, шунингдек, бир гуруҳ соҳа фаолларига Ўзбекистон ҚЯОЖ Наманган вилоят ташкилоти номидан қимматбаҳо эсдалик совғалари тантанали равишда топширилди.
