30 Yan 2019
Баёнот амалда
Бюллетенимизнинг аввалги сонида маълум қилинганидек, Ўзбекистон Қизил Ярим Ой Жамияти ва БМТнинг Болалар Фонди (ЮНИСЕФ) ўртасида “Ҳамжиҳатлик ва узоқ муддатли ҳамкорлик тўғрисида” Баёнот имзоланган эди.
Баёнот доирасидаги шерикчилик муносабатларининг мақсадларидан бири фавқулодда вазиятларда фойдаланиш учун заҳираларни жамлаш соҳасидаги ҳамкорликдир. 2019 йилнинг 30 январь куни Ўзбекистон ҚЯОЖ Марказий омборхонасига ЮНИСЕФ томонидан ушбу захираларни топшириш маросими бўлиб ўтди.
Марказий омборхонага қабул қилинган маҳсулотлар орасида сувни тозалаш учун махсус дизель генератори қурилмаси, сувни сақлаш учун катта ҳажмдаги идишлар, оилавий палаткалар, болалар хоналари учун палаткалар, болалар учун умумтаълим тўпламлари, болалар спорт анжомлари, кўрпа-тўшаклар ва бошқа зарурий нарсалар мавжуд.
Ушбу маҳсулотлар фавқулодда вазиятларда аввало болаларнинг манфаатларини инобатга олган ҳолда зарар кўрган аҳолининг эҳтиёжларини қондириш учун Баёнотни имзолаган ҳар икки томоннинг тайёргарлигини оширишга замин яратиб беради.