Янгиликлар

  Олдинги саҳифа

 

ЎЗБЕКИСТОН ҚЯОЖ НАВБАТДАГИ РАЁСАТИНИНГ НАТИЖАЛАРИ

 11 сентябрь куни Тошкент шаҳрида ЎҚЯОЖ Республика ўқув-услубий маркази биносида навбатдаги Раёсат бўлиб ўтди. Йиғилишда Жамият раҳбарияти, вилоят/минтақавий ташкилотлар раислари, ижро аппаратнинг масъул ходимлари ва Ўзбекистон соғлиқни сақлаш вазирлиги мутасаддилари иштирок этдилар.

 

Раёсат кун тартибида: Жамиятнинг 2020 йил биринчи ярим йиллигидаги фаолияти натижалари ва келгуси вазифалар тўғрисида, ЎҚЯОЖ Жиззах вилоят ташкилоти фаолияти, маблағ тўплаш декадасини ўтказилиши, ЎҚЯОЖ Сурхондарё вилояти Бандихон туман бўлинмасини ташкил этиш каби ва бошқа долзарб масалалар кўриб чиқилди.

Раёсатда ЎҚЯОЖ Раиси Х.Я.Каримов сўзга чиқиб, қуйидагиларни таъкидлаб ўтдилар. 2020 йилнинг ўтган ойлари нафақат Ўзбекистон учун, бутун жаҳон мамлактлари учун ўта мураккаб давр бўлди. Ушбу синовли кунларда умумхалқ ишидан ЎҚЯОЖ ходимлари ва волонтёрлари ҳам четда қолмади. Жамият ташкилотлари ва бўлинмалари тезкорлик муносабат билдириб жабрланган аҳолига имкон даражасида моддий ва маънавий ёрдамларини кўрсатмоқдалар. Март – август ойларида барча вилоят ташкилотлари эътиборли ишлар олиб бордилар. Айниқса Навоий, Самарканд, Бухоро, Андижон, Жиззах, Наманган, Тошкент вилояти ҳамда Тошкент шаҳри ташкилотлари короновирус профилактикаси бўйича фаол иш юритдилар. Йилнинг ўтган ойлари давомида короновирус инфекцияси тарқалишини олдини олиш ва унинг асоратларини енгиллатиш йўлида аҳоли ўртасида олиб борилаётган тарғибот-ташвиқот ишлари юзасидан:

- барча вилоятларда 1750 маротаба турли тадбирлар ўтказилган бўлиб, уларда қамраб олинган аҳоли сони 120 470 нафарни ташкил этди;

- барча вилоятларда фуқароларга 120 минг ниқоблар тарқатилди, ҳамда 475 минг дона санитар гигиеник махсулотлар ажратилди;

-  фуқаролар билимларини ошириш мақсадида минг дона ахборот буклет ва бюллетенлари тарқатилди.

Ушбу мақсадларга 203 млн. сўм миқдорида жамият ва ҳомийларнинг маблағлари сарфланди.

Аҳолининг ижтимоий муҳофазага муҳтож қатламларига амалий ёрдами кўрсатилди: шу жумладан

- 14 700 маротаба моддий ва ижтимоий-маиший хизматларга 474,0 млн сўм сарфланди;

- маҳалла ва оилани қўллаб-қувватлаш вазирлиги ҳузуридаги ҳомийлик ёрдамларини мувофиқлаштирувчи марказ ҳисоб-рақамига 15 млн. сўм юборилди;

- Жамият ҳомийлигида бўлган, ўзгалар қарамоғига муҳтож  якка-ёлғиз 3 мингга яқин кексаларга моддий ва ижтимоий-маиший хизматлар кўрсатилиб, 480 млн. сўм сарфланди; 

- аҳолига “COVID-19” короновируси тўғрисида билимларни етказиш мақсадида мингдан зиёд ахборот буклет ва бюллетенлари тарқатилди. Булардан ташфари, Сардоба туманида техноген аварияси натижасида жабрланган аҳолига инсонпарварлик ёрдамини кўрсатиш учун 30 млн. сўмдан зиёд маблағ сарфланганлиги қайд этилди.

Раёсатда кўриб чиқилган барча масалалар бўйича тегишли қарорлар қабул қилиниб, уларни ўз вақтида ва сифатли бажарилиши юзасидан вилоят/минтақавий ташкилотлар раисларига тегишли кўрсатмалар берилди.

 

 

 

ҲОМИЙЛИК ЁРДАМИНИ ЕТКАЗИШ

 АҚШнинг “Procter & Gamble” компаниясининг Ўзбекистондаги  дистрибьютори “Wings Distribution Company” МЧЖ томонидан беғараз ҳомийлик ёрдами билан 6800 пачка кир ювиш кукуни ва 5750 дона ювиш воситалари ажратилди ва ЎҚЯОЖ ходимлари томонидан жойларга етказилиб, кам таъминланган оилалар ва ногиронларга тарқатилди.

 

2 октябрь куни ЎҚЯОЖ  Ўзбекистон Республикаси Соғлиқни сақлаш вазирлиги қошидаги “Вирусология” илмий-тадқиқот институти ходимларига “NIVEA” компанияси томонидан ҳомийлик сифатида ажратилган 500 дона намловчи кремларни, шунингдек 500 пачка кир ювиш кукуни ва 500 дона ювиш воситаларини топширди.

 

 

 

ҚЎМОНДОНЛИК-ШТАБ ЎҚУВЛАРИ

 19-20 август кунлари Наманган вилоят ҳокими – фуқаро муҳофазаси бошлиғининг буйруғига мувофиқ Наманган вилояти Тўрақўрғон ва Чуст туманларида “Бошқарув органлари, ФВДТ ҳудудий ва функционал қуйи тизимларининг табиий ҳамда техноген хусусиятли фавқулодда вазиятлар оқибатларини бартараф этиш бўйича ҳаракати” мавзусида қўмондонлик-штаб ўқув машғулотлари ўтказилди.

 

  Тадбирда Ўзбекистон ҚЯОЖ вилоят ташкилоти офатларда ҳаракат қилувчи жамоаси аъзолари, вилоят Фавқулодда вазиятлар ва Соғлиқни сақлаш бошқармаларининг махсус хизматлари билан ҳамкорликда машғулот сценарияси бўйича амалий ҳаракатлар олиб бордилар. ЎҚЯОЖ вилоят ташкилоти махсус гуруҳи томонидан Санитария дружиналари аъзоларига фавқулодда вазиятларда ҳаракат қилиш тартиби, жабрланган аҳолига биринчи ёрдам кўрсатиш, энг зарур товарлар заҳираларини ташкил этиш ҳамда кам таъминланган оилалар ва жарбланганларга беғараз ёрдам кўрсатилишига оид масалалар юзасидан назарий ва амалий тушунчалар берилди. Булардан ташқари, Ўзбекистон ҚЯОЖ вилоят ташкилоти томонидан туман шошилинч тиббий ёрдам бригадалари учун дала шароитида зарур бўлган палаткалар шаҳарчаси ташкил этилди ва ўрнатилди.

 

 

 

ГРАНТНИНГ БАЖАРИЛИШИ

 Ўзбекистон Республикаси Олий Мажлиси ҳузуридаги нодавлат нотижорат ташкилотларини ва фуқаролик жамияти бошқа институтларини қўллаб-қувватлаш жамоат фонди томонидан тақдим этилган грант маблағлари асосида Ўзбекистон ҚЯОЖ Навоий вилояти ташкилоти ҳамда Ўзбекистон Ёшлар иттифоқи Навоий вилояти Кенгаши ҳамкорлигида “Коронавирусни биргаликда енгамиз!” шиори остида ижодий ишлар танлови ўтказилди.

  Барча ижодий ишлар коронавирус ва уни олдини олишга қаратилган мавзуда бўлиб, танлов қуйидаги йўналишларда ўтказилди: тасвирий санъат, назм ва наср, постерлар ва видеороликлар танлови. Булардан ташқари, телеграм ижтимоий тармоғининг “Koronavirus Info” расмий каналида “Коронавирусни биргаликда енгамиз” мавзусида онлайн викторина ўтказилди. Танлов ғолибларини тақдирлаш 2 октябрь куни ўтказилди. Энг яхши ишларнинг ғолиблари қимматбаҳо совғалар ва дипломлар билан тақдирландилар.

 

 

 

ЯНГИ ЛОЙИҲАГА СТАРТ БЕРИЛДИ

 

Ўзбекистон ҚЯОЖ ва Қизил Хоч ва Қизил Ярим Ой жамиятлари Халқаро федерацияси билан “Марказий Осиё давлатларида маҳаллий даражада табиий офатлар хавфини камайтириш орқали маҳаллалар барқарорлигини кучайтириш” номланган янги лойиҳа имзоланди. 15 сентябрь куни Самарқанд шаҳрида ушбу лойиҳани амалга ошириш тартибини муҳокама қилишга бағишланган йиғилиш бўлиб ўтди.

 

Лойиҳа доирасида Самарқанд вилояти Самарқанд шаҳри, Самарқанд, Каттақурғон ва Жомбой  туманларида жойлашган 12 маҳалла ва мактабларни фавқулодда вазиятларга тайёргарлигини ошириш, уларда  маҳалла фуқаро муҳофазаси йиғма гуруҳларни ташкил қилиш, ўқитиш, жиҳозлаш, хатар зоналар хариталарини тузиш, сел келадиган ариқлар қирғоқларини мустаҳкамлаш, шунингдек, мактабларда ўқувчиларни фавқулодда вазиятларда ҳаракат қилиш ва биринчи ёрдам кўникмаларига ўргатиш каби тадбирлар белгиланган.

 

 

 

COVID-19га ЖАВОБ

 

Қизил Хоч ва Қизил Ярим Ой жамиятлари Халқаро федерацияси ва Ўзбекистон ҚЯОЖ ўртасида коронавирус инфекцияси тарқалишини олдини олишга қаратилган “COVID-19га жавоб” номли амалга оширилаётган лойиҳа доирасида Қорақалпоғистон Республикаси ва вилоятлардаги Ўзбекистон Республикаси Соғлиқни сақлаш вазирлиги томонидан тавсия этилган юқумли касалликлар шифохоналарига (жаъми 14 шифохонага) сентябрь ойи давомида 700 дона кровать ва кўрпа-тўшаклар етказиб берилди.

                       

Ушбу лойиҳа доирасида 22-23 сентябрь кунлари ЎҚЯОЖ Республика ўқув-услубий маркази биносида COVID-19, санитария ва гигиена, фавқулодда вазиятларда психологик ёрдамини кўрсатиш, шунингдек, аҳоли ўртасида соғлом турмуш тарзини тарғиб қилиш бўйича Жамият ходимлари ҳамда волонтёрларининг билим ва кўникмаларини мустаҳкамлашга қаратилган семинар ўтказилди.

 

Семинар ишида масофадан туриб Қизил Хоч ва Қизил Ярим Ой жамиятлари Халқаро федерацияси Европа минтақавий ваколатхонаси мувофиқлаштирувчиси Д.Мухамадиев, ҚХ ва ҚЯОЖ халқаро федерацияси Марказий Осиё минтақавий ваколатхонаси соғлиқни сақлаш ва ижтимоий ёрдам бўйича вакили О.Амгаа ҳамда Дания Қизил Хочи ижтимоий-психологик қўллаб-қувватлаш ва ҳимоя қилиш бўйича делегати О.Русаковалар ўзларининг маърузалари билан қатнашдилар.

 

 

 

ТАБИИЙ ОФАТЛАРГА ТАЙЁРЛАНИШНИНГ  ИНСТИТУЦИОНАЛ ИМКОНИЯТЛАРИНИ КУЧАЙТИРИШ ВА ТИББИЙ ОФАТЛАР ХАВФИНИ КАМАЙТИРИШ

Қизил Хоч ва Қизил Ярим Ой жамиятлари Халқаро федерацияси кўмаги билан амалга оширилаётган ушбу Лойиҳа доирасида 15-18 сентябрь кунлари Ўзбекистон ҚЯОЖ Андижон вилояти ташкилоти томонидан вилоят Фавқулодда вазиятлар бошқармаси, Маҳалла ва оилани қўллаб-қувватлаш бошқармаси ҳамкорлигида Андижон туманидаги “Янги Тўлқин”, “Жаҳонобод”, “Беш паҳлавон” ва “Оқ роввот” маҳаллаларида “маҳалла фуқаро муҳофазаси” йиғма гуруҳларини тузиш бўйича тренинглар ўтказилди.

 Тренингларда маҳалланинг заифлик даражаси ва салоҳиятини аниқлаш, табиий офатлар хавфини камайтириш бўйича чора-тадбирлар, хавфлар харитасини тузиш, “маҳалла фуқаро муҳофазаси” гуруҳларнинг таркиби, мақсадлари ва вазифалари каби масалаларга эътибор қаратилди. Ўтказилган тадбирларнинг асосий мақсади - ўзини ўзи бошқариш органларни юзага келиши мумкин бўлган фавқулодда вазиятларда ҳаракат қилишга ўргатиш ва тайёрлашдан иборат бўлди.

 

 

ФАВҚУЛОДДА ВАЗИЯТЛАРДА БОШҚАРИШ

 3-7 сентябрь кунлари ЎҚЯОЖ ва Хитой Қизил Хочи ҳамкорлигида “Фавқулодда вазиятларда бошқариш” лойиҳаси доирасида, Наманган шаҳрида жойлашган “Зарафшон”, “Давлатобод”, “Навбаҳор” ва “Ахсикент” МФЙлари аҳолиси ҳамда фавқулодда вазиятлар давлат қуйи тизими хизматлари ва МФЙ ўз-ўзини бошқариш органлари билан бирга фавқулодда вазиятлар оқибатларини бартараф этиш бўйича ҳаракатлари юзасидан симуляцион ўқув-машқлар ўтказилди.

 

Машқда шаҳар ҳудудидаги ФВДТнинг барча хизматлар, Фавқулодда вазиятлар вазирлиги вакиллари, МФЙлари аҳолиси,  Ўзбекистон ҚЯОЖ вилоят ташкилоти ва шаҳар бўлими ходимлари, вилоят Табиатни муҳофаза қилиш қўмитаси ходимлари иштирок этдилар. Симуляцион ўқув машқида маҳалла ҳудудида сел-тошқин, ёнғин ва кўчки хавфи эҳтимоли вужудга келган фавқулодда вазиятлар пайтида, маҳалла фуқаролар йиғинларида ташкил этилган “Маҳалла фуқаро муҳофазаси” гуруҳлари аъзолари ва ФВДТ хизматларининг, шу жумладан Ўзбекистон ҚЯОЖ вилоят ташкилотининг офатларда ҳаракат қилувчи жамоаси ва волонтёрларининг ўзаро ҳамкорликдаги ҳаракатлари намоиш этилди.

 

Ушбу Лойиҳа доирасида 30 сентябрь куни Тошкент шаҳри Чилонзор тумани “Ал-Хоразмий” ва “Кўтарма” МФЙларида Ўзбекистон ҚЯОЖ Тошкент шаҳар ташкилоти томонидан симуляцион машғулот ўтказилди. Тадбирда “маҳалла фуқаро муҳофазаси” йиғма гуруҳларининг рўй бериши мумкин бўлган фавқулодда вазиятларда тўғри ҳаракат қилиши, ўзига ва ўзгаларга ёрдам кўрсатиш бўйича билим ва кўникмалари амалда синалди.

  

Машқ режасига мувофиқ зилзила натижасида талофат кўрган уйлар ва йўлаклар хавфи бартараф этилиб, содир бўлган ёнғин ўчирилди. Жабрланган 7 нафар аҳолини хавфсиз жойга эвакуация қилиниб, уларга биринчи ёрдам кўрсатилди. Тадбирда ҳамкор ташкилотлардан Фавкулодда вазиятлар ёнғин хавфсизлиги туман бўлими, тез тиббий ёрдам бригадаси ва Чилонзор туман ҳокимлиги вакиллари иштирок этдилар.

 

 

 

 

ЛОЙИҲАЛАР ДОИРАСИДАГИ ҲАМКОРЛИК

 

 Сирдарё вилояти Сардоба туманидаги сув омбори тўғони ўпирилиши туфайли жабр кўрган аҳолига инсонпарварлик ёрдамини кўрсатиш мақсадида 4 сентябрь куни Сардоба тумани “Юртдош”  ва “Дўстлик” маҳаллаларининг кам таъминланган ва ногирон фуқароларига ЎҚЯОЖ Ижро аппарати томонидан ЎҚЯОЖ ҳамда Германия Қизил Хочи билан ҳамкорликда амалга оширилаётган лойиҳа доирасида 70 та кроватлар жамланмаси ва матраслар, шунингдек, 70 тадан юз ва ҳаммом сочиқлари жамланмаси тарқатилди.

 

 

 

ПАНДЕМИЯ ДАВРИДА САХОВАТ ВА КЎМАК

 

Ўзбекистон Республикаси Вазирлар Маҳкамасининг 22.04.2020 йилдаги 213-ф сонли фармойиши билан “Саховат ва кўмак” жамғармаси ташкил этилди. Унинг маблағлари коронавирус пандемияси ва карантин даврида ижтимоий ҳимояга муҳтож, кўп фарзандли оилаларга, ногиронлиги бўлган шахсларга ва ёлғиз қарияларга, ўз даромадини йўқотган, вақтинча ишсиз бўлган жисмоний шахсларга кундалик истеъмол товарлари, дори воситалари ва бошқа маҳсулотлар билан таъминлаш учун сарфланиши белгиланган.

Халқимизга хос саховатпешалик каби эзгу фазилатлар кундан-кунга ўз ифодасини намоён этмоқда. Кўрсатилаётган мурувватдан кўнгиллар таскин топмоқда. Юртимизнинг турли ҳудудларида айни карантин шароитида турли ҳил саховат тадбирлари ўтказилиб келинмоқда.

Пандемия ва карантин даврида Ўзбекистон ҚЯОЖ ташкилотлари Жамият Раёсатининг 2020 йил       4 март кунидаги 18-1 сонли Қарори талаблари ижросини таъминлаш мақсадида, Жамғарма билан яқин ҳамкорликда Устав вазифаларини бажаришни давом эттириб келишмоқда. Шу жумладан, Ўзбекистон ҚЯОЖ Андижон вилоят ташкилоти коронавирусга қарши профилактик ишларни олиб бормоқда ва бозорларда, савдо шахобчалари ва кўчаларда ҳимоя воситаларидан - тиббий маскалар, антисептиклар, қўлқоплар, бактерицид совунлар ва стерилизация салфеткаларини таркатмоқда.

Шунингдек, ЎҚЯОЖ Наманган вилоят ташкилоти шаҳар бўлими коронавирус касаллигини  олдини олиш мақсадида аҳоли ўртасида, савдо марказларида, шаҳар автотранспорти, бозор ходимлари ва ташриф буюрувчиларга тарғиботни олиб бормоқда. Карантинга жойлаштирилганлар учун ташкилот томонидан 4 палаткада кўриб берилди. Булардан ташқари, волонтёрлар ёрдамида ташкилот қарамоғидаги кам таъминланган оилаларга шахсий гигиеник ва антисептик воситалар ҳамда ниқоблар бепул тарқатилди.

Ўзбекистон ҚЯОЖ Навоий вилояти Навбаҳор тумани бўлими туман ҳокимлиги, туман “Оила” маркази билан ҳамкорлигида, тумандаги 7 нафар ижтимоий ҳимояга муҳтож, ногиронлиги бўлган ва ётоқдаги фуқароларнинг ҳолидан хабар олиб, уларга озиқ-овқат маҳсулотларини етказиб берди. Шунингдек, Навоий вилояти Қизилтепа ҳамда Нурота туман бўлимлари Ногиронлар жамияти ҳамкорлигида ногиронлардан хабар олиб уларга совға саломлар улашдилар.

Шу жумладан, Ўзбекистон ҚЯОЖ Тошкент вилояти Оққўрғон туман бўлимининг фаоллигини ҳам алоҳида таъкидлаш жоиз. Оққўрғон туман бўлими ҳомийлар ёрдамида якка-ёлғиз, ногирон, кам таъминланган, эҳтиёжманд оилаларга хайрия эҳсонларини улашди.

 Ўзбекистон ҚЯОЖ Тошкент шаҳар ва Самарқанд вилоят ташкилотлари ҳам пандемияга қарши курашишга ўзининг ҳиссасини қўшиб келмоқда. Шаҳарлар  маркази ва фуқаролар гавжум бўлган жойларда коронавирусдан сақланиш тўғрисида тарғибот буклетлари ва тиббий ниқоблар фуқароларга бепул тарқатилди.

                “Саховат ва кўмак” умумхалқ ҳаракати доирасида Ўзбекистон ҚЯОЖ Тошкент вилоят ташкилоти, вилоят Адлия бошқармаси ҳамда Пискент тумани Савдо-саноат палатаси Тадбиркорликка кўмаклашиш маркази томонидан “Бекобод”, “Майлобод”,  “Саидобод”, “Холиқберди” ва “Дўнгқўрғон”  маҳаллалардаги 21 нафар эҳтиёжманд оилаларга ташриф уюштирилиб, фуқароларнинг муаммо ва эҳтиёжлари ўрганилди ва уларга ҳомийларнинг махсус совғалари топширилди.

Карантин вақтида ёши катталарнинг саломатлигини асрашга ҳам эътибор кучайтирилди. Шу мақсадда Ўзбекистон ҚЯОЖ Тошкент вилояти Ангрен шаҳар бўлими томонидан шаҳардаги ёлғиз кексалар ҳолидан хабар олинди ва шаҳар ижтимоий бўлими карамоғидаги 170 нафар ёлғиз қарияларга карантин даврида зарур бўлган сангигиена воситалари ва биринчи ёрдам учун дори-дармонлар волонтёрлар ёрдамида тарқатилди.

Ўзбекистон ҚЯОЖ Тошкент вилояти Олмалиқ шаҳар бўлими коронавирус инфекцияси тарқалишини олдини олиш мақсадида ҳимояланиш воситаларини ҳамда озиқ-овқат махсулотларини аҳолининг муҳтож қатламлари ва кекса қарияларга тарқатишни давом эттирмоқда.

Карантин даврида барча вилоятларда Жамиятнинг ташкилотлари томонидан фуқароларга жами
100 902 тиббий ниқоблар, 39 мингдан донадан зиёд санитар гигиеник воситалар, 33 минга яқин ахборот материаллари тарқатилди, ушбу мавзуга бағишлаб оммавий-ахборот воситаларида 279 маротаба чиқишлар уюштирилди.

 

 

 

 

“САРДОБА, БИЗ БИРГАМИЗ!”

 

Жорий йилнинг 1 май куни эрта сахарда Сирдарё вилояти Сардоба туманидаги сув омбори тўғони ўпирилиши туфайли вилоятнинг Сардоба, Оқолтин ва Мирзаобод туманларидаги минглаб киши талафот кўрди. Содир бўлган фавқулодда вазият туфайли жами 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинди. Уларнинг барчасига ҳукумат томонидан зарур шароитлар яратилиб, озиқ-овқат, кийим-кечак ва бошқа маҳсулотлар етказилди.

Фалокат рўй берган кунинг ўзидаёқ Ўзбекистон ҚЯОЖ Сирдарё вилояти ташкилоти офатларда ҳаракат қилувчи команда аъзолари Фавқулодда вазирлиги қутқарув хизматлари ва Миллий гвардия ходимларига ёрдам бериб, “Юртдош”, “Қўрғонтепа”, “Дўстлик” маҳаллаларидан фуқароларнинг эвакуация қилишда бевосита иштирок этишди.

Жабр кўрган сирдарёликларга ёрдам кўрсатиш мақсадида юртимиз бўйлаб хайрия акциялари ўтказилди ва бу акцияларда давлат ва нодавлат ташкилотлари иштирок этди.

 8 май куни Жамиятнинг Тошкент вилоят ташкилоти Ангрен ва Олмалиқ туман бўлинмалари ижрочи директорлари ҳамда волонтёрлар томонидан талофат кўрган аҳолига ёрдам кўрсатиш мақсадида Сардоба туманига гуманитар ёрдами етказилиб, Пахтаобод шаҳарчасидаги кўп қаватли уйларга ва  3-чи мактабгача таълим муассасасига жойлаштирилган фуқароларга топширилди.

Ўзбекистон ҚЯОЖ мурожаати билан Ўзбекистон ҚЯОЖ Ижро аппарати ва унинг ташкилотлари ҳам ушбу хайрли ишларга ўзларининг камтарона ҳиссаларини қўшишди. Наманган, Самарканд, Бухоро, Сурхондарё, Тошкент вилояти ва Тошкент шаҳар ташкилотлари ва бўлинмалари Сардоба фожиасидан жабрларган фукаролар учун жами 9,5 млн. сўм молиявий маблағни жамиятнинг республика ижро аппарати ҳисоб рақамига ўтказдилар. Ушбу маблағга қўшимча Ўзбекистон ҚЯОЖ ҳисобидан 17 млн. сўм ажратилди ва харид қилинган санитар-гигиеник воситалар, уй-рўзғор ва хўжалик товарлари, болалар аравачалари, биотуалетлар, кийим-кечаклар 5 ва 29 май кунлари жамиятнинг Сардоба туман бўлинмасига бевосита етказилди ва жабрланган фуқароларга тарқатилди.

Ўзбекистон Республикаси Адлия вазирлиги ва “Юксалиш” умуммиллий ҳаракати томонидан ташкил этилган “Салом Сардоба, биз биргамиз!” хайрия акцияси доирасида Ўзбекистон ҚЯОЖ ижро аппарати томонидан жабрланган аҳоли учун 100 матрас, 100 ёстик, 500 ёпинғичлар, 100 жуфт резина этиклар ва турли ҳил гигиена воситалари топширилди. Жами ушбу хайрия ишларга Жамият томонидан 27,5 млн. сўм сарфланди.

 

 

 

1 июнь - Халқаро болаларни ҳимоя қилиш куни

Болалар ҳаётимиз давомчилари, келажагимиз эгаларидир. Бинобарин, уларни асраб авайлаш, ҳар томонлама баркамол қилиб вояга етказиш ҳар бир давлат, ҳар бир оила, ҳар бир ота-онанинг муқаддас бурчидир. Ўзбекистонда ҳам фарзандларимиз ана шундай меҳр-муҳаббат, улкан ғамхўрликлар оғушида вояга етмоқда.

Халқаро болаларни ҳимоя қилиш кунига бағишлаб, Узбекистон ҚЯОЖ Наманган шаҳар бўлими томонидан кам таъминланган, кўп болали, боқувчисини йуқотган ва ногирон фарзандлари бор хонадонларга ташриф буюрилди. Ташриф давомида ҚЯОЖ бўлими томонидан болажонлар учун жами 1,3 млн. сўмлик эсдалик совғалари топширилди.

 

    

 

 

 

 

 

ФАХРИЙЛАРНИ ЭЪЗОЗЛАШ

 

                                                                                                                 

9 май “Хотира ва қадрлаш куни” арафасида Ўзбекистон ҚЯОЖ Навоий вилоят ташкилоти ходимлари томонидан Улуғ Ватан уруши қатнашчиси, Сталинград ҳимоячиси ва Украинада жангларда қатнашган, 1922 йилда Навоий вилоятида таваллуд топган Александр Гаврилович Ивушкин ҳолидан хабар олиб, уни кириб келаётган байрам билан табриклаб, совғалар хадия этилди.

 

Ўзбекистон ҚЯОЖ Тошкент шаҳар ташкилоти Миробод туман бўлими ҳам туман ҳокимлиги билан ҳамкорликда хайрли ишларни амалга оширмоқда. 9 май “Хотира ва қадрлаш куни” муносабати билан иккинчи жаҳон урушида иштирок этган ҳамда фронт ортида бўлган фахрийлар ва шунингдек, кекса, ночор ҳамда оғир ижтимоий аҳволга тушиб қолган қарияларнинг ҳолидан хабар олиниб, уларга озиқ-овқат маҳсулотлари ва бошқа совғалар инъом этилди.

 

 

 

БЕҒАРАЗ ДОНОРЛИК АКЦИЯСИ

 ”Яхшилик албатта қайтади!” шиори остида Ўзбекистон ҚЯОЖ Навоий вилоят ташкилоти вилоят Ёшлар иттифоқи ва ҳуқуқни муҳофаза қилувчи органлар ходимлари иштирокида хайрия акциясини ўтказди. Тадбирда ҳарбий хизматчи ва фуқаролар иштирок этиб, хасталикка чалинганлар ҳаётини сақлаб қолиш учун қон топширдилар.

 

 

 

 

 

 

ТАБИИЙ ОФАТЛАРДАН ТАЛОФОТ КЎРГАНЛАРГА ИНСОНПАРВАРЛИК ЁРДАМИ КЎРСАТИЛМОҚДА

 

27 апрель куни Бухоро вилоятида кузатилган табиий офат Олот ва Қоракўл туманларига жиддий зарар етказди. Кучли шамол натижасида 38 000 турар жой ва 800 дан зиёд ижтимоий объектлар, қишлоқ хўжалиги, ишлаб чиқариш ва хизмат кўрсатиш соҳаларига жиддий талофат етказилди. Давлатимиз томонидан офат асоратларини бартараф этиш, ундан зарар кўрган хонадонларга зудлик билан ёрдам кўрсатиш каби саъй-ҳаракатларга тегишли хизматлар, куч ҳамда воситалар жалб этилди.

Ўзбекистон ҚЯОЖ Бухоро вилоят ташкилоти томонидан ҳам Олот, Қоракўл, Ромитан, Когон ва бошқа туманлардаги офатдан зарар кўрган ва эҳтиёжманд оилаларга уй-рўзғор буюмлари, кўрпа-ёстиқ, кийим-кечак ва озиқ-овқат маҳсулотлари тарқатилди. Ромитан тумани “Ўтабек” маҳалласида ва “Шўрча” маҳалласи Сарикунда қишлоғида истиқомат қилаётган кам таъминланган оилалар ҳолидан хабар олинди ва уларга инсонпарварлик ёрдами кўрсатилди. Бундан ташқари, Ўзбекистон ҚЯОЖ Бухоро вилояти Когон шаҳар бўлими ходимлари томонидан ҳудуддаги “Истиқбол” маҳалласида истиқомат қилувчи боқувчисини йўқотган, моддий ёрдамга муҳтож оилаларга озиқ-овқат маҳсулотлари, уй рўзғор буюмлари, кийим-кечаклар тарқатилди.

Навоий вилояти Зарафшон шаҳрида 13 май куни кучли ёғингарчилик сабабли сел келиши кузатилди. Сел оқибатида 10 дан зиёд хонадон зарар кўрган бўлиб, 300 нафар фуқаро хавфсиз ҳудудларга эвакуация қилинди. Ўзбекистон КЯОЖ Зарафшон шаҳар бўлими шаҳар ҳокимлиги бошчилигида ҳамкор ташкилотлар билан жабр кўрган оилалар учун хайрия ва молиявий ёрдамларини кўрсатдилар.

 15 май куни Самарқанд вилоятида кузатилган кучли ёмғир натижасида Самарқанд шаҳрининг бир қатор кўчалари ҳудудига йиғилган оқова сувлари чиқиб кетиши, айрим фуқароларнинг ҳовлилари ва ертўлаларига сув киргани кузатилди ҳамда уйлар жиддий зарар кўрди. Шу жумладан, “Боғи-Темур” маҳалласида истиқомат қилувчи оила ҳам жабр кўрган, уйининг ярим қисми қулаб тушган эди. Ўзбекистон КЯОЖ Самарқанд вилоят ташкилоти ходимлари волонтёрлар билан биргаликда ушбу хонадонда ҳашар уюштиришиб, оилага ташкилот томонидан моддий ва маънавий ёрдамини кўрсатдилар.

 

 

 

Ўзбекистон Республикаси Вазирлар Маҳкамасининг 2020 йил 23 мартдаги “Коронавирус инфекцияси тарқалишига қарши қўшимча чора-тадбирлар тўғрисида”ги 176-сон қарори юзасидан

(инфографикаларда)

 

           

 

Ушбу Қарорга мувофиқ,

1. Ўзбекистон Республикаси ҳудудида 2020 йил 24 март соат 00-01 дан бошлаб коронавирус инфекцияси тарқалишига қарши кучайтирилган Тартиб жорий этилди.

Унга мувофиқ:

- Коронавирус инфекцияси асосан Тошкент шаҳри ҳудудида аниқланганлигини инобатга олиб ва ушбу инфекция республиканинг бошқа ҳудудларига тарқалишининг олдини олиш мақсадида бошқа ҳудудлардан Тошкент шаҳрига кириш тўхтатилди;

- Тошкент шаҳрига кирувчи ва чиқувчи шахсларда коронавирус инфекцияси аломатларини аниқлаш бўйича мажбурий тиббий назорат ўрнатилди;

- босқичма-босқич, Тошкент шаҳрида, Нукус шаҳри, вилоят ва туман марказларида жойлашган барча йирик деҳқон бозорлари ва савдо мажмуалари кириш-чиқиш жойларини тегишли мутахассислар билан таъминлаган ҳолда тепловизорлар ва антисептик воситалар билан жиҳозланади;

- Республика ҳудудига хорижий давлатлардан, шунингдек, Тошкент шаҳрига бошқа ҳудудлардан кириб келаётган барча транспорт воситалари, товар ва юкларнинг мажбурий равишда дезинфекция қилиниши таъминланади ва бошқалар.

 

2. Идоравий бўйсунуви ва ташкилий-ҳуқуқий шаклидан қатъи назар барча ташкилотлар раҳбарлари (иш берувчилар) қуйидагиларга риоя этишлари шарт:

- ташриф буюрувчи шахсларни фақат тиббий ниқоб ва тиббий воситаларни қўллаган ҳолда киритиш тартибини мажбурий жорий этиш;

- иш жойларида ходимларнинг тана ҳароратини ўлчаш ва тана ҳарорати юқори бўлган ходимларни иш жойида бўлишига йўл қўймаслик ҳамда ушбу ходимлар тўғрисида соғлиқни сақлаш органларига зудлик билан хабар етказиш;

- давлат санитария назорати органларининг талабномасига мувофиқ коронавирус инфекциясини юқтирган ходим билан мулоқотда бўлганлар ҳақида дарҳол маълумот бериш, касалланган шахс бўлган жойларни дезинфекциядан ўтказиш чораларини кўриш;

- ходимларга изоляция режимида бўлишга оид талабларга риоя этишда кўмаклашиш ва бошқа чоралар белгиланди.

Шу билан бирга, ушбу Қарор билан:

- Тартибнинг амал қилиш даврида коронавирус инфекцияси аниқланган Ўзбекистон Республикаси фуқаролари, фуқаролиги бўлмаган шахслар ва хорижий фуқаролар, шу жумладан 2020 йил январь-март ойларида коронавирус инфекцияси қайд этилган ҳудудларда бўлиб, Ўзбекистон ҳудудига кириб келган шахслар Комиссия қарорларига, Соғлиқни сақлаш вазирлиги ҳузуридаги Санитария-эпидемиологик осойишталик агентлиги ва эпидемияга қарши курашишга жалб этилган бошқа давлат ташкилотларининг қонуний талабларига риоя этишга ҳамда ўзида касаллик аломатлари вужудга келганда касаллик юқиши мумкин бўлган даврда мулоқотда бўлган шахслар ва ҳаракатланиш йўналишлари ҳақида зудлик билан соғлиқни сақлаш органларига маълумот беришга, соғлиқни сақлаш органлари томонидан тайинланадиган тиббий текширув ва даволанишдан ўтишга мажбурлиги ўрнатилди;

- “Коронавирус инфекцияси аниқланганда (гумон қилинганда) бажариладиган профилактик ва эпидемияга қарши чора-тадбирларни амалга ошириш тартиби тўғрисида”ги Низом тасдиқланди;

- республика махсус комиссияси ҳамда унинг таркибига кирувчи вазирлик ва идораларга Тартибнинг амал қилиш даврида бир қанча қўшимча вазифалар юкланди ва ҳуқуқлар берилди.

 

 

ЎЗБЕКИСТОН ҚИЗИЛ ЯРИМ ОЙ ЖАМИЯТИНИНГ ИНФЕКЦИОН КАСАЛЛИКЛАР, ЖУМЛАДАН, КОРОНАВИРУС ИНФЕКЦИЯСИ (COVID-19) ТАРҚАЛИШИНИ ОЛДИНИ ОЛИШ БЎЙИЧА ҚЎРАЁТГАН ЧОРАЛАРИ

 20 март 2020

Ўзбекистон Қизил Ярим Ой Жамияти томонидан Устав вазифаларbга мувофиқ, ваколатли давлат органлари билан биргаликда аҳоли ўртасида инфекцион касалликлар, жумладан, коронавирус инфекцияси (COVID-19) тарқалишини олдини олиш ва унинг асоратларини енгиллаштириш бўйича фаол амалий чоралар кўрилмоқда, жумладан:

- Жамият ходимлари ва кўнгиллилари одамлар гавжум жойларда- бозорлар, жамоат транспорти, автотургоҳлар, корхоналар ва маҳалларда аҳоли ўртасида санитар-оқартув ишларни олиб боришмоқда ва шахсий гигиена бўйича суҳбатлар уюштиришмоқда, бепул тиббий ниқоблар ва ахборот материаллари тарқатишмоқда (материаллар КХ ва ҚЯ Ҳалқаро Федерацияси, ХҚХҚ, БСТ ва ЎР ССВдан олинган);

 

- Жамият қарамоғидагилар ҳамда ўзгалар парваришига мухтож ёлғизлар, кексалар ва ногиронларга кўрсатилаётган амалий ёрдам кўлами кенгаймоқда.

 

 

  

 

   

 

 

  

 

 

НАВРЎЗ ТАБРИГИ


Жонажон юртимиз – Ўзбекистонимизга яшариш, баҳор ва гўзаллик байрами – Наврўзи олам кириб келмоқда. Шу дилбар фаслда табиатдаги ўзгаришларга уйғун бўлиб, жамиятимиз, ҳаётимиз ҳам ўзгариб, янгиланиб бормоқда. Янги-янги уй жойлар, таълим, тиббиёт ва маданият масканлари, замонавий корхоналар, обод қишлоқ ва маҳаллалар юртимиз чиройига чирой қўшмоқда. Наврўз қадриятлари – одамларнинг дарду ташвиши билан яшаш, кексаларга ҳурмат, муҳтож инсонларга эътибор ва ёрдам кўрсатиш, адолат ва халқпарварлик фаолиятимиз мезонига айланмоқда.

 

2020 йил Ўзбекистон Республикаси Президенти Ш.М.Мирзиёев ташаббуслари билан “Илм, маърифат ва рақамли иқтисодиётни ривожлантириш йили” деб эълон қилинди. Давлатимиз раҳбари Олий Мажлисга Мурожаатномасида қайд этганидек, “Инсон манфаатлари ҳамма нарсадан устун” деган тамойил асосида халқимиз ҳаётини тубдан яхшилаш бўйича аҳоли фаровонлигини ошириш, унинг ижтимоий ҳимоясини кучайтириш, соғлиқни сақлаш тизимини ривожлантириш, тиббий хизмат сифатини ошириш, хотин-қизлар ва ёшларни қўллаб-қувватлаш, аҳоли ўртасида соғлом турмуш тарзини кенг қарор топтиришга қаратилган ишлар давом эттирилади ва янги босқичга кўтарилади. Шунга мувофиқ, Ўзбекистон Қизил Ярим Ой Жамияти фаолиятида ҳам ҳомийликдаги фуқароларга манзилли ёрдам кўрсатиш, якка-ёлғиз, ногиронлар ва муҳтож оилаларга моддий ва маънавий кўмаклашиш, соғлом турмуш тарзини тарғиб қилиш ва мустаҳкамлаш, оиладаги тиббий маданиятни юксалтиришга алоҳида эътибор қаратилади.

 

Режалаштирилган кенг қамровли лойиҳаларни амалга ошириш учун бизнинг Жамиятимизда кучли ва ишончли салоҳият мавжуд.

 

Қадрли дўстлар! Ана шу қутлуғ айём – Шарқона янги йил билан сизларни чин юракдан муборакбод этиб, барчангизга сиҳат-саломатлик, хонадонингизга бахту саодат, файзу барака, инсонпарварлик фаолиятингизда муваффақиятлар тилайман.

 

Ўзбекистон ҚЯОЖ раиси,
профессор Х.Я.Каримов

 

 

 

ТЕМИР ЙЎЛЧИЛАРНИ БИРИНЧИ ЁРДАМ КЎНИКМАЛАРИГА ЎРГАТИШ

24 феврал 2020

Ўзбекистон ҚЯОЖ Темир йўл минтақавий ташкилоти ташаббуси билан “Тошкент минтақавий темир йўл узели” унитар корхонасида ишчи-ходимларнинг фавқулодда ҳолатда тиббий ёрдамга муҳтож фуқароларга тез тиббий ёрдам етиб келгунча биринчи ёрдам кўрсатиш бўйича билим ва кўникмаларини оширишга бағишланган  тадбир бўлиб ўтди.

ЎҚЯОЖ биринчи ёрдам кўрсатиш бўйича кординатори Марсель Собиров узел ишчи-ходимларига биринчи ёрдам кўрсатиш шартлари, талаблари ва меъёрлари ҳақида назарий ва амалий маълумотларни бериб ўтди. – Темир йўл соҳасида фаолият кўрсатаётган мутахассисларнинг фуқароларга фавқулодда ҳолатларда биринчи ёрдам кўрсатиш шартларини чуқур билишлари жуда ҳам зарур,  – дейди ЎҚЯОЖ Темир йўл минтақавий ташкилотининг ижрочи директори Дилафрўз Каримова. – Чунки, уларнинг меҳнат фаолияти асосан кўп сонли ишчи-ходимлар билан бирга ўтади. Айниқса, вокзалларда, станцияларда ҳамда корхоналарда бу каби нохуш ҳолатлар юз берса ҳамкасблари ёхуд фуқароларимизга фавқулодда ҳолатда тез тиббий ёрдам келгунича биринчи ёрдамни кўрсатиб, ҳаётини сақлаб қолишлари мумкин.

“Тошкент минтақавий темир йўл узели” унитар корхонасида ўтказилган бу каби тадбир яқин орада пойтахтимиздаги тармоқ корхоналарида, шундан сўнг республикамиз ҳудудидаги барча темир йўл ташкилотларида малакали мутахассисларимиз иштирокида мунтазам ўтказилиши кўзда тутилган.                                       

 

 

МАКТАБЛАР ВА МАКТАБГАЧА ТАЪЛИМ МУАССАСАЛАРИДА ОФАТЛАР ХАТАРИНИ ПАСАЙТИРИШ

 23 феврал 2020

“Табиий офатларда бошқариш” лойиҳаси доирасида ЎҚЯОЖ Тошкент шаҳар ташкилоти томонидан Тошкент шаҳридан танлаб олинган Чилонзор ва Миробод туманларидаги умумтаълим мактаблари ҳамда мактабгача таълим муассасаларида ўтказилган тренинглар якуни бўйича симуляциявий машғулотлар ўтказилди.

Уч босқичдан иборат бўлган (сафда туриш, аптечка жихозлари, Қизил Хоч ва Қизил Ярим Ой Халқаро ҳаракати тарихи; биринчи ёрдам кўрсатиш;  йўл ҳаракати хавфсизлиги қоидалари ва жабрланганларни эвакуация қилиш) мусобақаларда 30-31 январь кунлари Чилонзор туманидаги 181 ва 195а сонли,  7-11 февраль  кунлари Миробод туманидаги  213 ва 125 сонли умумтаълим мактабларининг иккита 7-синф ва иккита 8-синф ўқувчиларидан ташкил топган санитар постлари “Саломатликнинг ёш дўстлари” мусобақасида ўзаро беллашдилар.

Булардан ташқари,  3-4 февраль  кунлари Чилонзор туманидаги  363 ва 204 сонли мактабгача таълим муассалари,  5-10 февраль кунлари Миробод туманидаги 521 ва 126 сонли мактабгача таълим муассалари тарбиячилари ва ходимлари иштирокида симулияцион машқлар  ўтказилди.

 Машғулот мавзуси содир бўлиши мумкин бўлган зилзила вақтида тарбияланувчиларни хавфсиз ҳудудга эвакуация қилиш ва жабрланган болажонларга биринчи ёрдам кўрсатиш бўйича амалий ҳаракатларни синаб кўришдан иборат бўлди. Тадбирлар сўнгида барча иштирокчиларга ва ғолиб командаларга фахрий ёрлиқлар ва эсдалик совғалари тақдим этилди.

 

 

ҚЎМОНДОНЛИК-ШТАБ ЎҚУВ МАШҚИ


21 феврал 2020

19-21 февраль кунлари Самарқанд вилояти Пастдарғом туманида “Бошқарув органлари, ФВДТ худудий ва функционал қуйи тизимларининг табиий ҳамда техноген хусусиятли фавқулодда вазиятлар оқибатларини бартараф этиш бўйича ҳаракати” мавзусида қўмондонлик-штаб ўқув машқи ўтказилди ва унда ЎҚЯОЖ Самарқанд вилояти ташкилоти 24 нафар сандружиначилари билан иштирок этди.

 Ўқув машқининг режасига мувофиқ, туман йиғма механизациялашган отряди саф кўригидан ўтказилди, туман тиббиёт бирлашмаси қошидаги биринчи тиббий ёрдам отряди томонидан зилзила натижасида кўп сонли жабрланганларни қабул қилиш бўйича дала шароитида амалий ҳаракатлар намойиш этилди. Булардан ташқари, Ошиқота махалла фуқаролар йиғинида Зарафшон дарёсининг сув тошқини натижасида 200 нафар аҳоли хавфсиз худудга эвакуация қилинди ҳамда фавқулодда вазият натижасида зарар кўрган 20 нафар кам таъминланган оилага ЎҚЯОЖ Самарқанд вилояти Пастдарғом туман бўлинмаси томонидан озиқ-овқатлар тўплами беғараз ёрдам сифатида тарқатилди. 

 

 

 

ОФАТЛАРДА ҲАРАКАТ ҚИЛУВЧИ КОМАНДАНИНГ ТРЕНИНГИ

19 феврал 2020

17-19 февраль кунлари “Қирғизистон, Тожикистон ва Ўзбекистонда табиий офатларга тайёрланишнинг институционал имкониятларини кучайтириш ва табиий офатлар хавфини камайтириш” номли лойиҳа дастури доирасида Андижон вилоятида 15 нафар волонтёрлардан ташкил топган Офатларда ҳаракат қилувчи команданинг амалий машғулотлари ўтказилди.

 

Тадбирнинг биринчи куни команда аъзолари ўзининг назарий билимларини шакллантириб олдилар ва асосий тадбирлар 18-19 февраль кунлари ўтказилди. 18 февраль куни команда аъзолари вилоят ФВ бошқармаси ходимлари билан ҳамкорликда жабрланган аҳолини эвакуация қилиш ишларини амалга оширишни синаб кўрдилар, 19 февраль куни эса вилоятнинг Андижон туманида жойлашган “Боғишамол” болалар оромгоҳида палатка қуриш, қутқарув арқонлари ва ўт ўчириш воситаларидан тўғри фойдаланиш ҳамда фавқулодда вазият натижасида жабрланганларни қидириб топиш ва уларга биринчи ёрдам кўрсатиш бўйича кўникмаларини мустаҳкамлаб олдилар. Ушбу тадбир мазмунли ва самарали ўтиши учун унга маҳаллий аҳоли вакиллари ҳам жалб этилди. Тренинг якунида фаол иштирок этган волонтёрлар эсдалик совғалари билан тақдирландилар.
 

      

 

 

 

ХАЛҚАРО ҚИЗИЛ ХОЧ ҚЎМИТАСИ ДЕЛЕГАТИНИНГ  ТАШРИФИ

6 феврал 2020

      4-6 февраль кунлари Халқаро Қизил Хоч Қўмитасининг биринчи ёрдамни ривожлантириш бўйича делегати, биринчи ёрдам бўйича халқаро тоифадаги мастер-тренери Андрей Нечай Ўзбекистонга ташриф буюрди.

 Ташриф доирасида Ўзбекистон ҚЯОЖ Тошкент шаҳар ташкилоти ва Тошкент вилояти Олмалиқ шаҳар бўлими фаолияти билан танишилди ҳамда аҳолини биринчи ёрдам кўникмаларига ўргатиш борасидаги ишлар мониторингдан ўтказилди. Булардан ташқари, Халқаро Қизил Хоч Қўмитасининг Марказий Осиёдаги минтақавий ваколатхонаси ва Ўзбекистон ҚЯОЖ ижро аппаратида бўлиб ўтган музокараларда Ўзбекистон ҳудудида русий забон миллий жамиятлар вакиллари учун халқаро ва минтақавий тадбирларни режалаштириш, ташкил этиш ва ўтказиш масалалари муҳокама этилди. Ташриф якунида, таклифларга биноан, А.Нечай томонидан биринчи ёрдам бўйича мастер-класс ўтказилди.

 

       

 

 

 

“МАҲАЛЛА ФУҚАРО МУҲОФАЗАСИ” ЙИҒМА ГУРУҲЛАРИ БИЛАН ИШЛАШ

31 январ 2020

Амалга оширилаётган “Фавқулодда вазиятларда бошқариш” лойиҳа доирасида Ўзбекистон ҚЯОЖ вилоят ташкилоти мутахассислари томонидан 30-31 январь кунлари Наманган шаҳридаги Ахсикент номли маҳалла фуқаролар йиғини фаоллари билан семинар-тренинг ўтказилди. Тадбирда фавқулодда вазиятларда ҳаракат қилиш ва биринчи ёрдам кўрсатиш масалалари юзасидан сўз юритилди.

Семинарда лойиҳани бажаришга тааллуқли бўлган қуйидаги вазифаларга эътибор қаратилди – бу энг аввало маҳаллалардаги хавф-хатарлар харитасини тузишга кўмаклашиш, фавқулодда вазиятларда аҳолини эвакуация қилиш режаларини ишлаб чиқиш, аҳоли ва “Маҳалла фуқаро муҳофазаси” йиғма гуруҳи аъзоларини биринчи ёрдам кўрсатиш кўникмаларига ўргатиш ва симуляциявий машқларни ўтказиш, маҳаллий аҳолини йиғиш ва эвакуция қилиш, маҳалла - мактаб - болалар боғчаси тизимидагиларни хавфсиз жойларга шошилинч йиғиш бўйича амалий машғулотлар ташкил қилиш ва ҳ.к. Булардан ташқари, маҳалла аҳолисининг фавқулодда вазиятлар юзага келганда, асосий кучлар етиб келгунига қадар мавжуд бўлган имкониятлар ва ресурслардан келиб чиқиб, мустақил ҳаракатланиш масалаларига алоҳида тўхталиб ўтилди
 

 

 

МАКТАБГАЧА ТАЪЛИМ МУАССАСАЛАРИ ХОДИМЛАРИНИ БИРИНЧИ ЁРДАМ КЎНИКМАЛАРИГА ЎРГАТИШ

 21 январ 2020

Ўзбекистон ҚЯОЖ Сурхондарё вилоят ташкилоти ва вилоят Мактабгача таълим бошқармаси ўзаро ҳамкорлик тўғрисидаги тузилган иш режасига асосан, жорий йилнинг 25 январь куни Термиз тумани мактабгача таълим бўлими хамшираларини биринчи ёрдам кўрсатиш кўникмаларига ўргатиш бўйича семинар-тренинг ўтказилди. Тадбирда Термиз туман ҳокими ўринбосари, туман хотин-қизлар қўмитаси раиси Ў.С.Маҳмудова иштирок этди.

Семинар иштирокчиларига Қизил Хоч ва Қизил Ярим Ой Халқаро Ҳаракатининг тарихи ва тамойиллари, Ўзбекистон ҚЯОЖ вазифалари бўйича батафсил тушунчалар берилди. Биринчи ёрдам кўрсатиш асослари ва элементлари намойиш этилди. Булардан ташқари, “Соғлом турмуш тарзи”га амал қилиш ҳамда Ўзбекистон Республикасининг “Қон ва унинг таркибий қисмлари донорлиги тўғрисида”ги Қонунининг мазмун-моҳияти, беғараз донорликни ривожлантиришга доир ишлар бўйича тегишли тушунчалар берилди. Тингловчиларнинг ўқув жараёнида олган билимлари амалий машғулотлар орқали синовдан ўтказилди.
 

 

 

2020-2025 ЙИЛЛАРДА ЎЗБEКИСТОН ҚИЗИЛ ЯРИМ ОЙ ЖАМИЯТИНИ РИВОЖЛАНТИРИШНИНГ СТРАТEГИК РEЖАСИ

 

Қизил Хоч ва Қизил Ярим Ой Халқаро Ҳаракати XXXIII Халқаро Конференциясида қабул қилинган ҚХва ҚЯО ХҲнинг “20-30 стратегияси” раҳбарият ва қарорлар қабул қилишни имкон қадар локал даражага ўтказишни — ўзгаришлар марказига жамоаларни жойлаштиришни кўзда тутади. Халқаро ҳаракатнинг фаолияти эзгуликнинг ҳаракатлантирувчи кучи бўлмиш мисли кўрилмаган, руҳан қудратли волонтёрликка асосланган. Бу эса, ўз ўрнида, Ҳаракатга ўзини Қизил Хоч ва Қизил Ярим Ойнинг қадриятлари билан чамбарчас боғлиқ деб билувчи ҳар бир кишини жалб қилишни талаб этади.

Стратегияда узоқ муддатли истиқболни эътиборга олиб, самарали ва принципиал раҳбарликни амалга ошириш, ҳурмат муҳити ҳамда гендер тенглиги тамойилларига риоя қилган ҳолда, барча даражаларда аёл раҳбарларнинг иштирок этишига замин яратиш, гуманизм манфаати учун ва одамларнинг азоб-уқубатларини енгиллаштирадиган кучли, муваффақиятли фаолият юритадиган глобал ва маҳаллий ташкилотларнинг тармоғини яратишдир.

 

Ўзбекистон ҚЯОЖ томонидан ишлаб чиқилган Стратегиянинг мақсади — волонтёрларимиз сонини кўпайтириш, кўнгиллилик ва фуқароларни жалб қилиш моделларимизини янгилашдан иборат, бу эса, ўз ўрнида, 2019 йил 2 декабрь куни қабул қилинган «Волонтёрлик фаолияти тўғрисида»ги ЎРҚ-585 сонли Ўзбекистон Республикаси қонунига мос келади.

 

Ўзбекистон ҚЯОЖ стратегик ривожлантириш режасининг мақсадлари қуйидаги глобал муаммоларни ҳал қилишни кўзда тутади:

1-муаммо: Иқлимга оид ва атроф-муҳит инқирози.

2-муаммо: Ривожланаётган инқироз ҳолатлари ва офатлар.

3-муаммо: Соғлиқни сақлаш ва фаровонликка оид глобал камчиликлар.

4-муаммо: Миграция ва шахс.

5-муаммо: Қадриятлар, ҳокимият ва инклюзивлик.

 

Ўзбекистон ҚЯОЖ «2020-2025 Стратегияси» асосида қуйидаги муаммоларни ҳал қилиш вазифаларини белгилайди:

- ҳукумат олдида ўзининг ёрдамчилик ролини самарали равишда бажариш ва бошқа гуманитар ташкилотлар учун инқирозли вазиятлар ва табиий офатларни тушунишда ишончли шерик бўлиш;

- мамлакат аҳолисининг энг муҳтож қатламларига – ўзгалар ёрдамига муҳтож ёлғиз қарияларга, ногиронларга, сурункали касал оилаларга, кам таъминланган оилаларга, етим болаларга гуманитар, тиббий-ижтимоий ёрдам бериш, соғлом турмуш тарзини тарғиб қилиш, юқумли касалликларнинг олдини олиш, аҳолини биринчи ёрдам кўрсатиш кўникмаларига ўргатиш, беғараз донорликни тарғиб қилиш, аҳолини фавқулодда вазиятларга тайёрлаш бўйича давлат тузилмаларига ёрдамчи функциясини бажаришни давом этиш;

- экологик назоратга оид давлат ва нодавлат органлари, шунингдек, иқлимга салбий таъсир кўрсатадиган корхоналар билан иқлим ва экологик инқирознинг аҳолининг заиф қисмига салбий таъсирини камайтириш учун ҳамкорликда иш олиб бориш;

- аҳоли соғлиғини сақлашни такомиллаштириш учун давлат муассасаларига таълим тадбирларни ташкил этишда аҳолининг кенг қатламлари орасида ахборот материалларини тарқатиш орқали ёрдам бериш;

- аҳоли миграциясининг салбий оқибатларини камайтириш учун ҳар томонлама курашиш;

- ўзаро ҳурмат, бағрикенглик, ўзаро ёрдам каби кўп асрлик тарихий, ахлоқий ва маданий қадриятларни мустаҳкамлашга ҳисса қўшиш, ҳукуматнинг республика аҳолисининг заиф қатламларини ҳимоя қилиш ва уларга гуманитар ёрдам беришга қаратилган барча даражалардаги интилишларига кўмаклашиш. Инклюзивликни кенгайтириш — яъни имконияти чекланган одамлар ўзларини ёлғиз ҳис қилмасликлари ва жамиятга қўшилишлари учун улар билан ишлашни кенгайтириш;

- ўз салоҳиятимизни ошириш, ишончли ва узоқ муддатли ресурс манбаларига эга бўлиш.

Миллий жамиятни ривожлантиришнинг 2020-2025 йилларга мўлжалланган стратегик режаси «20-20 Стратегияси»нинг мантиқий давоми бўлиб, у Жамиятни янада ривожлантиришга, унинг салоҳиятини мустаҳкамлашга ва аҳолининг заифлигини камайтиришга оид фаолиятнинг юқори самарадорликка эришишига қаратилган. Хозирги кунда ишлаб чиқилган Стратегия лойиҳаси Жамиятнинг барча бошланғич ташкилотларида ўрганиб чиқилмоқда ва келгусида келиб тушган таклифларни инобатга олган холда, уни тасдиқлаш учун XXII Қурултой кун тартибига киритилади.

 

 

 

ЯНГИ ҲАМКОРЛИККА СТАРТ БЕРИЛДИ

16 январ 2020

15 январь куни Андижон шаҳрида маҳаллий ҳокимият вакиллари ва вилоятдаги Андижон тумани Беш паҳлавон, Оқ ровот, Янги тўлқин ҳамда Жаҳонобод номли маҳалла фуқаролари йиғинлари фаоллари билан Қизил Хоч ва Қизил Ярим Ой жамиятлари Халқаро Федерацияси томонидан молиялаштирилаётган “Қирғизистон, Тожикистон ва Ўзбекистонда табиий офатларга тайёрланишнинг институционал имкониятларини кучайтириш ва табиий офатлар хавфини камайтириш” деб номланган янги лойиҳа дастури билан таништирув учрашуви ўтказилди. Тадбирда Андижон вилояти ФВ бошқармаси ва “Маҳалла” хайрия жамоат фонди вакиллари иштирок этишди.   

         Учрашувда дастурнинг мазмун-моҳияти, шу жумладан, маҳаллалар фуқаро йиғинлари, таълим муассасаларида фавқулодда вазиятлар хавфини камайтириш, фавқулодда вазиятларга тайёргарлик учун керакли буюмларини харид қилиш, аҳолини биринчи ёрдамга ўқитиш, улар билан симуляцион машқларни ташкил қилиш ҳамда ҚЯОЖ вилоят ташкилотининг фавқулодда вазиятлардаги хатти-ҳаракатлари самарадорлигини оширишга қаратилган чора-тадбирлар тўғрисида сўз юритилди. Тадбир иштирокчилари лойиҳа юзасидан ўзларининг фикрларини билдирдилар. Учрашув якунида Ўзбекистон ҚЯОЖ ва тегишли идоралар ўртасида ҳамкорлик бўйича келишув меморандумлари имзоланди.

 

 

 Олдинги саҳифа

© Ўзбекистон Қизил Ярим Ой Жамиати