Сайт  харитаси

Янгиликлар

<  1   2   3   4   5   6   7   8  >

 

1 июл 2017 й.

                             Тарихдаги илк ташриф

 

2017 йил 29 июндан 1 июлгача Қизил Хоч ва Қизил Ярим Ой Жамиятлари Халқаро Федерацияси Президенти жаноб Тадатеру Коное Ўзбекистонга ташриф буюрди. Юқори мартабали меҳмоннинг мамлакатимиздаги дастурида – ҳукумат аъзолари билан учрашувлар, соғлиқни сақлаш ва фавқулодда вазиятлар  вазирликларига ташриф, Ўзбекистон ҚЯОЖ раҳбарияти ва мутахассислари билан мулоқотлар ҳам бўлиб ўтди. Расмий ташриф Тошкент ва Самарқанд шаҳарларининг диққатга сазовор жойларини кўриш билан тўлдирилди.

 

Бу тарихий лаҳзалардир. Халқаро ҳаракат тузилгандан буён ҚХ ва ҚЯО Жамиятлари Халқаро Федерациясига бошчилик қилувчи аппаратнинг олий лавозимдаги раҳбари Ўзбекистонга илк бор расмий ташриф билан келди. Марказий Осиёдаги бешта мамлакатдан бизнинг мамлакатимиз танлангани ҳам бежиз эмас. ҚХваҚЯО ХФ Президенти билан учрашувлар ташкил этишни режалаштиришда ўзаро манфаатли масалалар, шу жумладан, Миллий Жамиятнинг инсонпарварлик фаолияти билан боғлиқ, хусусан, ҳуқуқий ва норматив ҳужжатларни ишлаб чиқишга оид масалаларга эътибор берилди. Бундан ташқари, гуманитар йўналишдаги асосий масалалар ва Ўзбекистон Қизил Ярим Ой Жамиятининг давлат дастурларини бажаришдаги ёрдамчилик ўрни, унинг ҳуқуқий ва қонунчилик базасини янада ривожлантиришга оид масалалар ҳам муҳокама қилинди.

 

Ўзбекистон ҚЯОЖ томонидан Низом йўналишларининг барчаси бўйича олиб борилаётган мақсадга мувофиқ ишлар бизнинг ташкилотимиз дунёдаги 50 та энг яхши Миллий Жамиятлар орасидан муносиб жой олишига имкон берди. Бу Қизил Хоч ва Қизил Ярим Ой Жамиятлари Халқаро Федерациясининг Минтақавий ташкилотларни ривожлантириш Қўмитаси мониторинги натижасидир. Бу хабар шу йилнинг бошида ана шундай нуфузли халқаро ташкилотнинг Ўзбекистон ҚЯОЖ раисига юборган махсус мактубида тилга олинган. Мактубда жумладан: “Сизнинг Миллий Жамиятингиз барча мезонларга мос келади ва дунёдаги 190 та Миллий Жамиятларнинг илғор 50 таси сафида турибди”, дейилади.

 

Халқаро Федерация Президенти мониторинг якунларини ўз кўзлари билан кўриб, бунга ишонч ҳосил қилди. Барча учрашувларда у ўз сўзларини шундай бошлар эди: “Мен Халқаро Федерациянинг Ўзбекистонни, унинг меҳнаткаш ва очиқ чеҳрали халқини кўришга мушарраф бўлган ва унинг ноёб ўтмиши билан танишган Халқаро Федерациясининг биринчи Президенти бўлганимидан жуда шодман”.

 

Ҳурматли меҳмоннинг учрашувлари жадвали ходисаларга бой  бўлди. Вазирлар Маҳкамасида мамлакат Бош вазири ўринбосари Т.К.Норбоева билан бўлган учрашув жуда қизиқарли ва мазмунли ўтди. Меҳмонларга ушбу гуманитар ташкилотнинг давлат дастурий ҳужжатларини мақсадли амалга оширишга, Ҳаракатнинг Асосий тамойилларини ҳаётга татбиқ этишга қўшаётган катта ҳиссаси борасида ахборот берилди.

 

Соғлиқни сақлаш вазирлигида ҳамкорликнинг устувор йўналишлари муҳокама этилди, улар орасида – патронаж, якка-ёлғиз, ўзгалар ёрдамига муҳтож қарияларга кўмаклашиш, беғараз донорликни ривожлантириш, соғлом турмуш тарзини кучайтириш масалалари кабилар бор эди. Миллий Жамият ходимлари самимийлик ва ишонч руҳида ўтган ушбу учрашув натижаларидан кўп нарса кутишмоқда.

 

Ўша куни Миллий Жамиятда байрамона руҳ ҳукмрон бўлди. Жамият раҳбарлари, мутахассислари ва кўнгиллилари меҳмонларни самимий кутиб олдилар. Дўстона учрашувда фикрлари, режалари билан ўртоқлашдилар. Юқори мартабали меҳмон Ўзбекистоннинг етакчи ОАВига интервью берди.

- Мен бугун бир нечта учрашувлар ўтказдим. Улар менда унутилмас кайфият уйғотди, - деди Халқаро Федерация Президенти. – Ўзбекистон хукумати, қатор вазирлик ва идоралар ЎҚЯОЖнинг мақсадли фаолияти ҳақида  кенг маълумотга эга бўлганлиги, уларни яхши билиши,  ҳамда эзгулик йўлидаги фаолиятга яқиндан ёрдам кўрсатишга доимо тайёрлигини кўрдим. Яқиндан ёрдам бор, олиб борилаётган ишларнинг мазмуни моҳиятини тушуниш бор – демак,    янада ривожланиш ҳам бўлади, - дея таъкидлади жаноб Коное.

 

Бу каби учрашувларни ташкил этишнинг яна бир асосий мақсади – Миллий Жамият салоҳиятни мустаҳкамлаш, келгусидаги инсонпарварлик вазифаларини адо этишда давлат тизимлари билан ҳамкорликни муҳокама қилишдир. Суҳбатлар чоғида Жамият бундан укйин инсон ресурсларига алоҳида эътибор қаратиши бир неча бор таъкидланди. Ҳамма нарса  - инсон бахт-саодати, унинг манфаатлари учун - мавзуси суҳбатлар жараёнида белгиловчи омил бўлди. Тадатеру Коное жаноблари ҳам бу фикрни ўз нутқида таъкидлади. Шунингдек меҳмон

 

Ўзбекистон Қизил Ярим Ой Жамиятининг Халқаро Федерация мониторинги натижасида дунёдаги 50 та энг илғор  Миллий Жамиятлар сафига кўтарган кишиларни кўриш истагига эришганидан бағоят шод эканини қайта қайта такрорлади.

 

 

 

26 май  2017  й.

 

Тактик ўқув  машқлари

 

2017  йил  23-25 май  кунларида  Тошкент шаҳар ва Тошкент вилояти бошқарув органлари, ФВ  ҳудудий қуйи тизимларининг аҳоли ва ҳудудларни табиий ҳамда техноген  фавқулодда вазиятлардан муҳофаза қилиш бўйича ҳаракатлари  мавзусида қўмондонлик-штаб ўқув машқлари ўтказилди. Унда ЎҚЯО  Жамияти Тошкент шахар ташкилотининг мутахассислари фаол қатнашишди.

 

Тонги соат 7:32.  Машқларнинг биринчи куни.  ЎҚЯОЖ  тизимидаги барча қуйи тизимлар ва кўнгилли тузилмалар Мирзо Улуғбек туманидаги Технология касб-ҳунар коллеж ҳудудидаги пунктга йиғилди. Туман Офатларга қарши тезкор жамоаси томонидан 2 та палатка барча жиҳозлари билан ўрнатилди, презентациялар давомида Ўзбекистон ҚЯОЖ захирасидан келтирилган  барча жиҳозларнинг ишлаш техникаси кўрсатиб ўтилди, тезкор жамоа машғулотга тайёргарлиги ва унинг   фаолияти намойиш этилди.  

 

Фавқулодда вазиятлар режимига ўтказиш сигнали берилди.  Куч ва воситалар  жабрланган ҳудудларга тақсимланди. Тошкент шахрида 7 та  жойга палаткалар, муляжлар, санпост ва сандружиналар учун униформалар, палаткани жиҳозлаш учун ашёлар хамда жабрланган  аҳолига тарқатиладиган гуманитар ёрдам етказиб берилди. Тактик машғулотлар  Яккасарой, Шайхонтоҳур, Бектемир,  Яшнобод, Миробод, Юнусобод ва  Олмазор туманидаги ташкилот ва муассасаларда бўлиб ўтди.   АЖ “Фотон”, АЖ “Тошкентдон махсулотлари”, ОАЖ “Иссиқлик маркази”, “Coca-Cola”  корхоналари вазиятга тайёрлаш ишларини олиб бордилар.

 

ЎҚЯОЖ тезкор қутқарув гуруҳлари, сандружина аъзоларидан ташкил топган гуруҳлар юқори профессионал даражада тайёр эканликларини намойиш этдилар.  Сценарий бўйича жамоамиз вакиллари табиий газнинг сизиб чиқиши натижасида портлаш содир бўлиб, ичимлик суви тизимининг ишдан чиқишига олиб келинган ҳолатда, йўл транспорт ҳаракати ҳодисаси рўй берганда жабрланган инсонларга биринчи ёрдам кўрсатиш, техноген авария натижасида кимёвий хавфли модданинг атроф-муҳитга тарқалиши ва ишлаб чиқариш цехидаги ёнғинни содир бўлганда ёрдам кўрсатиб, аҳоли  орасида юқумли касалликларни олдини олиш бўйича амалий ёрдам кўрсатишди.              

 

Ўтказилган команда-штаб машғулотларида  гуманитар ташкилотидан   176 нафар ишчи ходим ва 3 та кўнгилли  отрядлари иштирок этди. Икки юздан зиёд жабрланган аҳолига психологик ва биринчи ёрдам кўрсатилди,  300 нафар кишига инсонпарварлик ёрдами берилди. Ўқув машқлари якунида ЎҚОЖ Тошкент шаҳар ташкилоти Фавқулодда Вазиятлар Вазирлигининг Фаҳрий ёрлиғи билан тақдирланди.

 

 

 

19 май  2017  й.

 

Инсонпарварлик ва ҳамжиҳатлик байрами

 

Пойтахтимизнинг сўлим гўшаларидан бири баҳорий кайфият билан барчани кутиб олди.  2017 йил 19 май куни Ғафур Ғулом номидаги маданият ва истироҳат боғида Қизил Хоч ва Қизил Ярим Ой Халқаро кунига бағишланган байрам тадбири бўлиб ўтди.

 

Қуёш нурларига тўлган кунда ЎҚЯО Жамияти ташаббуси билан Тошкентнинг ушбу соя-салқин бурчаги ҳамкор ташкилотлар вакиллари, Миллий Жамият фаоллари ва кўнгиллилари ихтиёрига берилди. Асосий дарвозадан бошланувчи аллеяларнинг барчаси Халқаро Ҳаракат тимсоллари ва байроқлари билан безатилди. Марказий амфитеатр  қатнашчиларнинг байрам руҳига мос равишда панно ва турли рангли шарлар билан ясатилди.   .

 

Ўзбекистон ҚЯО Жамиятининг Раиси, профессор Ҳ.Ё.Каримов ва ХҚХҚнинг Марказий Осиёдаги Минтақавий ваколатхонаси раҳбари  Жан Жером Касабьянка меҳмонларни муборакбод этдилар.

 

Байрам тадбири иштирокчилари Миллий Жамият салоҳиятини катта қизиқиш билан кўздан кечирдилар.  Боғ марказида Ўзбекистон ҚЯОЖнинг кенг кўламли фаолиятини акс эттирувчи махсус палаткалар ўрнатилди. Биринчи ёрдамга ўргатиш кўникмаларига мўлжалланган жиҳозлар, фавқулодда вазиятлар бўйича қўлланмалар, кўчма тиббиёт асбоблари жамоатчилик эътиборига ҳавола қилинди ҳамда Жамият ходимлари уларни қизиқтирган барча саволларга жавоб беришди.  

 

Беғараз донорлик Миллий Жамият Низомига оид фаолиятнинг муҳим йўналишидан биридир. Боғда республика “Қон маркази” шифокорларининг махсус бригадаси ишлади, бу эса донорларга инсонпарварлик акциясида иштирок этишга имкон берди.  Майдончаларнинг яна бири  “Саломатликнинг ёш дўстлари” санитар постлари жамоалари ихтиёрига бериб қўйилди. Бу ерда командалар ўртасида танловнинг шаҳар босқичи бўлиб ўтди.  

 

Танловда қатнашган 11 та гуруҳ орасидан ғолиблар  аниқлаб олинди. Биринчи ўрин Тошкент шаҳар Олмазор туманидаги 11-мактаб жамоасига, иккита 2-ўрин Яшнобод туманидаги 166-мактаб ва Учтепа туманининг 116 мактаб сандружиначиларига, иккита 3-ўринни эса  Сергели туманидаги 305- ва Юнусобод туманининг 259 мактаб дружиначилари эгаллашди. 

 

 

                                                             

 

18 май  2017  й.

Инсонпарварлар форуми

 

ҚОЗОҒИСТОН. 2017 йил 16-17 май кунлари Алматида Шарқий Европа, Жанубий Кавказ ва Марказий Осиё мамлакатлари Миллий Жамиятлари раҳбарларининг халқаро форуми бўлиб ўтди. Ушбу ишчи учрашувида Ўзбекистон ҚЯОЖ делегацияси ҳам иштирок этди.

 

Миллий жамиятлар вакиллари минтақавий инсонпарварликнинг ривожи ҳамда Қизил Хоч ва Қизил Ярим Ой Халқаро Ҳаракати барча таркибий қисмлари ва қатнашчиларининг ўзаро алоқаларига оид қатор муҳим масалаларни муҳокама қилдилар.

 

Халқаро Ҳаракат вакилларининг минтақада амалга оширилаётган фаолиятга бағишланган чиқишлари, 2017 йилги Уставга оид учрашувларга – Бош Ассамблея ва Делегатлар Кенгашига  тайёргарлик ишлари ҳақида ахборотлар берилди. Шунингдек Миллий жамиятларда ёшлар ҳаракатини ривожлантириш, 2018 йилда Алматида бўладиган Европа Минтақавий Конференциясини ўтказишга оид масалалар муҳокама қилинди.

 

Форумда Ўзбекистон ҚЯОЖ делегациясининг тақдимоти намойиш этилди. Ушбу чуқур  маълумотга эга маъруза миллий ва минтақавий даражалардаги инсонпарварлик фаолиятини амалга ошириш учун маблағ йиғиш соҳасидаги янгича ёндошувларга бағишланди.

 

Йиғилиш якунларига кўра Миллий Жамиятларга Ҳаракат доирасида ФВга тайёрланиш ва у юз берганда ҳаракат қилиш, қонунчилик базасини кучайтириш, минтақавий ҳамкорликни ривожлантириш, ёшлар ва кўнгиллилар ролини ошириш, ресурсларни жалб этиш соҳасидаги салоҳиятни кучайтириш ва мувофиқлаштириш йўналишларидаги фаолиятларини янада кучайтириш таклиф этилди.

 

 

 

12 май  2017 й. 

Эзгулик йўлида

 

НАМАНГАН. 2017 йил 5 май кунида Ўзбекистон ҚЯОЖ Наманган вилоят ташкилоти уч  сана шарафига – Хотира ва қадрлаш куни, Қизил Хоч ва Қизил Ярим Ой Халқаро куни ҳамда вилоят инсонпарварлик ташкилотининг 50 йиллигига бағишлаб “Барча жойда ҳамма учун” шиори остида қатор тадбирлар ташкил қилди.  

 

Вилоят маъмурияти, вазирлик ва идоралар раҳбарлари ва ходимлари, ҳамкорлар ва инсонпарварлик ташкилотининг мутахассислари Наманган санъат коллежининг катта залига тўпландилар.  Учрашув ибтидосидаёқ инсон манфаатлари йўлида ушбу инсонпарварлик ташкилотининг асосий тамойилларини амалга ошириш учун ярим аср мобайнида амалга оширилган ишлар ҳақида алоҳида таъкидланди.

 

Сўзга чиққан вилоят ҳокимининг ўринбосари, хотин-қизлар қўмитасининг раиси Х.К.Юсупова Миллий Жамият мутахассисларини якка-ёлғизлар, қариялар, ногиронлар, кам таъминланган оилалар ва “Меҳрибонлик” уйлари тарбияланувчиларини қўллаб-қувватлаш бўйича  амалга ошираётган вазифаларига  юқори баҳо берди. Инсонпаврварлик ташкилотининг аҳолини биринчи тиббий ёрдам кўрсатиш кўникмаларига ўргатиш,   фавқулодда вазиятларга тайёрлашдаги фаолияти бебаҳо, дея таъкидлади ўз сўзида ҳоким муовини.

 

Йиғилишда ҳамкорлик ташкилотлари вакиллари “Халқ билан мулоқот ва инсон манфаатлари йили” давлат дастурида кўрсатилган вазифаларни амалга ошириш доирасида олиб борилаётган биргаликдаги ишлар самарадорлиги ҳақида гапирдилар. Ушбу байрам шодиёналари кунида  инсонпарварлик ташкилотининг энг яхши вакилларига, Халқаро Ҳаракат ветеранларига Фахрий ёрлиқлар ва эсдалик совғалари топширилди. Шу кунни ўзида инсонпарварлик ташкилоти мутахассислари ўз васийлигидаги оилаларга ташриф буюриб, вилоят ташкилотининг фахрли ходимларига эсдалик совғалари топширдилар.

 

Учрашув байрамона ёзилган дастурхон, эстрада хонандаларининг чиқишлари ва бир пиёла чой устидаги суҳбатлар билан тўлдирилгани айниқса қувончли бўлди

 

 

 

 

10 май  2017  й.

 Виждон амри билан  

 

Нашримизнинг нигоҳида  – Андижон. Кейинги вақтда   минтақа  ташкилоти  ўз олдига қўйилган вазифаларни муваффақиятли бажариши билан кўзга ташланмоқда. Ташкилот ўз ҳисобига маблағ йиғиш бўйича мақсадли фаолият олиб боргани учун, бугунги кунга  келиб 1 миллиард 200 минг сўм маблағ тўпланди.

 

- Бу ҳам ҳали чегара эмас, - дейди Ўзбекистон ҚЯОЖ Андижон вилоят ташкилоти раиси Холида Мирзараҳимова. – Биз ўз ишимизни тўғри ташкил этдик холос. Бевосита шахсий мулоқот ўрнатганимиз сабаб ташкилот ва идораларнинг барча раҳбарлари бизга пешвоз чиқишмоқда. Яна бир жиҳат – йиғилган маблағларнинг манзилли йўналтирилаётгани. Тушган маблағларнинг қаерга ва кимларга таҳсим қилиниши, ва  бу кўмакнинг қанчалик муҳимлигини кўргач, ҳар бир кишида ушбу эзгу ишларга дахлдорлик ҳисси ўйғонади.

 

Холида опа ўз васийлигида турувчи инсонларнинг ҳар бири билан юзма-юз кўришади. Ким нимага муҳтожлигини, қандай яшаётганини, биринчи навбатда қандай ёрдам бериш кераклигини яхши билади. 9-май – Хотира ва қадрлаш куни ҳам воқеаларга бой бўлди. Ушбу кунда нафақат совғаларни тайёрлаш ва уларни тарқатиш, балки ҳар бир уйга шахсан бориш ҳам керак бўлди. Байрам арафасида кириб келган меҳмонларни ўзгача қувончи ила биринчи гуруҳ ногирони Ҳикматхон Нуруддинова, ёлғиз яшовчи нафақахўр Дарья Бушуевалар кўплар қатори кутиб олишди, озгина эътибор ва чин юракдан суҳбат қуриш бундай кишиларни беҳад шод этди.

 

- Фақат ўтган йилнинг ўзида, давлат дастури доирасида вилоят ташкилоти томонидан васийликдаги одамларимизга кўмаклашиш учун 20 миллион сўмдан ортиқ маблағ йўналтирилди, - дейди Холида Телмановна. – Муравват уйларида яшовчилар, мактаб-интернатда тарбияланаётганларга доимий ғамхўрлик қиламиз, уларга моддий ва маънавий ёрдам кўрсатамиз. Уларни  зарур тиббий ашёлар ва чойшаблар билан таъминлаш учун 81 миллион сўмдан ортиқ маблағ йўналтирилди.

 

Инсон омили  - жуда муҳим жиҳатлардан биридир.  Агар яхши жамоа тузилган бўлса, ишингизнинг муваффақияти таъминланган бўлади. Бу ҳақда ташкилот ходимлари ўз фикрларини билдирадилар.

 

Эргашева Феруза – Пахтаобод туман ташкилотининг “Меҳр-шафқат” хизмати тиббиёт ҳамшираси:

- Менинг қарамоғимда 24 киши бор, уларнинг барчаси ижтимоий ҳимояга муҳтож, ҳар бирига ўзига хос ёндашиш керак. Кимгадир руҳий кўмак зарур, бошқасининг уй юмушларига кўмаклашиш ёки ҳовлисини тартибга келтириш керак, яна кимдир суҳбатдошга муҳтож. Бу кишиларнинг барчасидан биз меҳримизни сираям аямаймиз.

 

Зарнигор Маҳмудова – 29-мактабнинг 7-синф ўқувчиси, “Ёш қутқарувчи” мактаб жамоасининг аъзоси:

- ДИПЕКО-9 лойиҳаси менга кўплаб янги дўстлар топишга кўмаклашди. Ташкилот мутахассиси Ильмира Садовникова бизга жуда яқин ва яхши дўст бўлиб қолди. У киши  фавқулодда вазиятлар юз берган вақтда тўғри хатти-ҳаракат қилишни, ўз вақтида шифокор келгунча биринчи ёрдам кўрсатишни ўргатди.

Азизбек Бойматов – Офатларга қарши тезкор жамоа аъзоси:

 

- Мен Жамиятнинг кўнгиллиси эканлигимдан фахрланаман! Ўтган вақт мобайнида мен кўп нарсаларни ўргандим. Энг аввало ўзим учун энг муҳим сифатни – ўзимга ишонишни, мустаҳкам дўстликни, бир жамоа бўлиб ишлашни ўргандим.             

 

 

                         

 

15 апрел 2017 й .

Беминнат хизмат

 

Темир йўл минтақавий ташкилоти – Ўзбекистон ҚЯОЖнинг йирик ташкилотларидан биридир. Ҳозирги кунда барча вилоятларда унинг бўлинмалари мавжуд.    “Меҳр-шафқат” хизмати фаолияти ҳам йилдан йилга  такомиллаштирилмоқда. Ҳозирги кунда хизматнинг патронаж ҳамширалари   440 дан ортиқ кишининг ўз қарамоғига олган.

 

Турли тақдирлар. Турли вазиятлар. Тақдир тақозоси билан улар ўз яқинлари ва қариндошлари эътиборидан четда қолишган. Аммо давлат уларни қаровсиз қолдирмади. Миллий Жамиятда мамлакатимизнинг якка-ёлғиз қолган фуқароларига кундалик ғамхўрлик қилиш ва уларнинг муолажаси билан шуғулланувчи ҳамшираларнинг махсус жамоаси меҳнат қилишади. Васийларимиз доимо яхши парваришда, саломатлиги  дуруст, улар мунтазам қилинаётган ғамхўрлик ва эътиборни ҳис қилишади ҳамда мамлакатимизда юз бераётган ажойиб ўзгаришларни диққат билан кузатишиб, ёшларни юртимиздаги тинчлик ва осойишталикни сақлашга чақиришади. Ва ҳар куни ўзларининг оила аъзосига айланиб қолган,  ўзларига қадрдон бўлган тиббиёт ҳамширасининг ташрифини сабрсизлик билан кутишади.

Улардан бири  - Шаҳло Мавлоновадир. Ҳамшира  йигирма йилдан бери Темир йўл ташкилотининг Ховос бўлимида меҳнат қилади. Темир йўл хизмати фахрийлари, ижтимоий кўмакка муҳтож кам таъминланган оилалар - унинг васийлигидаги кишилардир. Тиббиёт ҳамшираси уларга зарур бўлган муолажаларни амалга оширади, диспансеризация пайтида мутахассис врачлар кўригига олиб боради, соғлом турмуш тарзига оид суҳбатлар ўтказади.  

 

Ўтган йили Ўзбекистон ҚЯОЖ Темир йўл ташкилотининг “Меҳр-шафқат” хизматига 10 мингдан зиёд киши мурожаат қилган. 62 мингдан ортиқ муҳтож одамларга тиббий ёрдам кўрсатилди.   Моддий ёрдам ҳам мунтазам ажратиляпти – шу йилнинг ўзида савоб ишларга 105 миллион сўм йўналтирилди.  

 

 

 

3 апреля 2017  й.

Биринчи ёрдам - барча учун

 

ҚОРАҚАЛПОҒИСТОН. Вазирлар Маҳкамасининг махсус қарори билан  Ўзбекистон ҚЯО Жамияти  зиммасига  аҳолини эҳтимолий  фавқулодда  вазиятларга  тайёрлаш бўйича  алоҳида вазифалар юклатилган ягона  жамоат ташкилотидир.   Ушбу ҳужжатни амалга ошириш доирасида Қонликўл ва Шуманай туманларида семинар-тренинглар ташкил этилди.

 

Белгиланган вазифаларни самарали бажариш мақсадида Қорақалпоғистон Республикаси Соғлиқни сақлаш вазирлиги ва Фавқулодда вазиятлар Бошқармаси томонидан ташкилотлар, муассасалар ва ўқув юртларида тузилган санитар дружиналари, санитар постлари аъзоларини ўқитиш бўйича қўшма тадбирлар режаси ишлаб чиқилди. Дастур аҳолини эҳтимоли бўлган ФВга тайёрлаш, биринчи ёрдам кўрсатиш кўникмаларига ўргатиш, соғлом турмуш тарзини тарғиб қилиш, аҳолининг турли қатламлари орасида тиббий ва санитар-гигиеник билимларни тарқатиш масалаларини ўз ичига олади.

 

Таълим муассасаларида санитар постлари тузилиб, уларни ўқитиш жадвали ишлаб чиқилди. ФВда жабрланганлар ва беморларни муолажа қилиш, уларга биринчи ёрдам кўрсатишнинг замонавий усуллари ўрганилди. Тренинг қатнашчилари шунингдек Халқаро Ҳаракатнинг тарихи, Ўзбекистон ҚЯОЖ фаолиятининг Устав йўналишлари билан ҳам танишдилар. Кўнгиллилар сунъий нафас олдириш техникаси, боғлам қўйиш қоидалари, жароҳатланганларни кўчириш масалалари билан амалиётда танишдилар.

 

Семинар якунида барча қатнашчиларга махсус сертификатлар топширилди.

 

 

28 март 2017 й.

ҒОЛИБЛАРНИ ШАРАФЛАЙМИЗ

 

2017 йил 28 март куни “Инсонийлик” Республика илмий-методик марказида Ўзбекистон ҚЯОЖнинг мамлакат ОАВ журналистлари учун матбуот конференцияси бўлиб ўтди. Учрашувда “2016 йилда Ўзбекистон ҚЯОЖ фаолияти тўғрисида ОАВдаги энг яхши журналистик материал” кўрик - танлов ғолибларига  тантанали равишда совғалар топширилди.

 

Меҳмонларни байрам муносабати билан  безатилган “Инсонийлик” Маркази  кутиб олди. Мажлислар зали Жамиятнинг минтақавий ташкилотлари раҳбарлари ва мутахассислари, ХҚХҚдан келган меҳмонлар, Ўзбекистон ҚЯОЖ раҳбарияти ва мутахассислари  ва тантана  қаҳрамонлари  бўлмиш ОАВ журналистлари билан гавжум.

 

Ўзбекистон ҚЯОЖ раиси, профессор Ҳ.Ё.Каримов матбуот анжуманининг очилишидаги сўзида 2016 йил мамлакатимизнинг энг кекса ташкилоти учун ўзига хос йил бўлганини таъкидлади. Жумладан,   “Соғлом она ва бола” Давлат Дастурида ЎҚЯО Жамиятига юклатилган барча вазифалар шараф билан адо этилди. Жамият тасарруфидаги якка-ёлғиз кексалар, ногиронлар, кўп болали оилаларга хайрия, моддий ва маънавий ёрдам кўрсатиш, фавқулодда вазиятлар  вужудга келганда аҳолига кўмаклашиш, юз ёшли ва ундан ошган кексалар аҳолига манзилли ёрдам кўрсатишдек улкан мақсадли ишлар амалга оширилди. Бундай ҳайрли ишлар учун Миллий Жамият томонидан 600 миллион сўмдан ортиқ маблағ сарфланди.

 

ХҚХҚнинг Марказий Осиёдаги Минтақавий ваколатхонаси Раҳбари   Жан Жером Касабьянка  йиғилганларга ўз табригини йўллади. “Бизнинг ҳамкорлигимиз мустаҳкамланмоқда ва кенгаймоқда – деди у. – Биз келгусида эҳтимоли бўлган фавқулодда вазиятларга тайёрланиш ва  ҳаракатланиш, халқаро гуманитар ҳуқуқни тарғиб этиш, аҳолига  биринчи ёрдам кўрсатиш малакаларини ўргатиш каби соҳаларда ҳамкорликни давом эттирамиз”.

 

Ниҳоят энг ҳаяжонли лаҳзалар етиб келди. Саҳнага “Ўзбекистон Қизил Ярим Ой Жамияти ва Халқаро Ҳаракатнинг 2016 йидаги фаолиятини ОАВда энг яхши ёритиш” танловининг ғолиблари таклиф этилади. Тадбир қатнашчилари эътиборига ушбу танловга юборилган ишларнинг презентацияси намойиш этилди. Танлов ҳайъати газета, радио, телевидение, интернет-сайт бўйича барча номинациялардаги энг муносиб ишларни аниқлаб берди. Бунда икки юз атрофидаги ишлар кўриб чиқилди.

 

Танловнинг 12та ғолиби  Ўзбекистон ҚЯОЖнинг махсус совға ва дипломлари билан тақдирландилар. Бу йилги танлов ғолиблари қаторида – «Uzbekistan Today» нашри раҳбари Г.Бабаджанова, “Ишонч” газетаси муҳаррири К.Боймуродова, “Вести Каракалпакстана” газетаси мухбири Т.Климова, “Пойтахт”, “Маҳалла” ва “Ўзбекистон” радиоканаллари мухбирлари Ш.Абзалова, Х.Юнусов, М.Оппоқхўжаева, МТРКнинг “Пойтахт” ахборот дастури муҳаррири Э.Дебердеева, “Маҳалла” канали редактори Ш.Худойбердиев,  Жиззах вилоят телевидениеси бош муҳаррири Ў.Холбеков,  “Туркистон-пресс” ва ЎзА муҳбирлари Х.Қодиров ва И.Аввалбоев,  “Новости Узбекистана” сайти мухбири Т.Рахматуллаевлар ўрин олишди. 

 

Шу куни 2017 йилда журналистлар ўртасида бўлиб ўтадиган танловга старт берилди.

 

 

 

21 март 2017  й.

 

 

Наврўз қутлови

 

Янгиланиш, гўзаллик ва нафосат байрами  - Наврўз азал азалдан энг қадимий миллий байрамимиз бўлиб келган. У инсонпарварлик, раҳмдиллик, ўзаро ёрдам ва олийҳимматлик каби абадий қадриятларни ўзига жо этганлиги учун ҳам ҳаммамиз учун қадрлидир. Бу баҳорий байрам ўзининг инсонпарварлик руҳи билан ҳар бир кишининг қалбига яқин. Наврўз ғоялари бу йил ўзининг 92 ёшини нишонлаётган мамлакатимизнинг энг кекса гуманитар ташкилоти - Ўзбекистон Қизил Ярим Ой Жамиятининг мақсад ва вазифалари билан ҳамоҳанг.

 

Биз бу санани кучли кадрлар салоҳияти, ижтимоий аҳамиятга молик давлат дастурларини қўллаб-қувватлашга йўналтирилган кўп томонлама фаолиятимиз билан қарши оламиз. Алоҳида мамнуният билан Миллий Жамиятимиз   Халқаро Қизил Хоч ва Қизил Ярим Ой Жамиятлари Федерацияси томонидан юқори даражада баҳолаганлигини таъкидламоқчиман.  “Сизнинг Жамиятингиз барча мезонларга жавоб беради ва илғор 50 та Миллий Жамиятлар қаторида турибди” - дейилади ушбу нуфузли халқаро ташкилотнинг мактубида. Ташкилотимизнинг аҳолини ФВ юз берганда биринчи ёрдам кўрсатишга ўқитиш, Халқаро инсонпарварлик ҳуқуқини тарғиб қилиш, кўнгиллилар ҳаракатини ривожлантириш йўналишларида олиб бораётган фаолияти экспертларнинг ижобий баҳосини олди. Бунда Миллий Жамиятимизнинг ҳар бир аъзосининг ҳиссаси беқиёс.

 

Кириб келган 2017 йил “Халқ билан мулоқот ва инсон манфаатлари йили” деб эълон қилинди. Демак, Ўзбекистон Қизил Ярим Ой Жамияти фаолиятида қарамоғимиздагиларга манзилли ёрдам кўрсатишга, кўп болали оилаларга моддий ва маънавий кўмаклашишга, соғлом турмуш тарзини мустаҳкамлашга, оилада тиббий маданиятни оширишга, оналик ва болаликни қўллаб-қувватлашга эътибор кучайтирилади. Кенг кўламли  лойиҳаларни амалга ошириш учун Жамиятимизда кучли ва ишончли салоҳият мавжуд.

 

Баҳорнинг шундай ёруғ кунларида оилаларингизга тинчлик-хотиржамлик, бахт-саодат, мустаҳкам соғлик-омонлик тилайман. Хонадонингиздан файзу барака аримасин!

 

Ўзбекистон ҚЯОЖ

Раиси

Ҳ.Ё.КАРИМОВ

 

 

 

10 март 2017 й.

 

Амалий ёрдам

 

2017 йил 10 март кунида Ўзбекистон ҚЯОЖга ХҚХҚнинг Марказий Осиёдаги Минтақавий ваколатхонаси томонидан юрак-ўпка реанимацияси тренинги учун 20 дона манекен топширилди.

 

Аниқ билим олиш – тўғри ҳаракат қилиш – ҳаётни сақлаб қолиш демакдир! Ўзбекистон ҚЯОЖнинг биринчи тиббий ёрдам кўрсатиш бўйича тренерлари муваффақиятининг формуласи ана шундай. Ҳаётдан ортиқ қадрли нарсанинг ўзи йўқ. Фавқулодда вазиятда уни сақлаб қолиш одатда тасодифий юз беради, ФВга шоҳид бўлган шахс, бехато ҳаракат қилган тақдирдагина, қутқарувчига айланиши мумкин. Аммо профессионал қутқарувчилар ўзларига шундай ҳаракат қилишга йўл бермайдилар. Улар реал тажрибаларига суянган ҳолда у ёки бу вазиятда қандай ҳаракат қилишни аниқ билишлари керак. Ана шундай юксак профессионализм эса қутқарувчилар учун манекенлардан фойдаланилган ўқув машғулотларида олинади.

 

Тренажёр-манекенлар амалда биринчи тиббий ёрдам кўрсатишнинг асосий усулларини ўқиш ва яхшилаб ўрганиб олишга ёрдам беради. Инсон танаси ва унинг физиологик хусусиятларини деярли аниқ ифодаловчи махсус тренажёр-манекенлардан фойдаланиш энг самарали методика саналади. Улар Ўзбекистон ҚЯОЖнинг биринчи ёрдам кўрсатиш тренерларига машғулотларни жуда ҳам сермаҳсул ўтказишга ёрдам беради.  

 Машғулотларни ўқитишнинг турли усул ва воситаларнинг янги авлоди билан таъминлаш биринчи тиббий ёрдам кўрсатиш бўйича семинарларда олинган билимларни амалда самарасини беради.  

 

 

 

25 феврал 2017 й.

 

Тактик машқлар

 

Жиззах. 2017 йил 23-25 феврал кунлари Ғаллаорол туманида команда-штаб ўқув машқлари бўлиб ўтди. Унда вилоят ФВ бошқармасининг бўлинмалари, Ўзбекистон ҚЯОЖ вилоят ташкилотининг мутахассислари, тиббиёт коллежининг санитар дружиналари иштирок этишди. 

 

Машқлардан мақсад – “Зилзила билан боғлиқ ФВнинг олдини олиш бўйича чораларнинг, шу жумладан, улар юз берган тақдирда аҳолининг хатти-ҳаракат кўрсатишга тайёргарлигини оширишга оид комплекс тадбирлар дастури”нинг  ижроси бўйича ҳамкор ташкилотларнинг фавқулодда вазиятларга  тайёргарлигини текшириш. 

 

Сценарийга мувофиқ, машқларнинг биринчи куни санитар дружиналар “Маданият” маҳалласидаги жабрланган  аҳолини “Булоқбоши” маҳалла фуқаролар йиғинида жойлашган коллеж биносига эвакуация қилишда ёрдам бердилар. Шартли равишда жабрланганларга биринчи ёрдам кўрсатилди, улар озиқ-овқат билан таъминланди, кўп болали ва кам таъминланган 30 дан ортиқ оилага инсонпарварлик ёрдами берилди.

 

Ғаллаорол тиббиёт коллежи ҳудудида ҳам қутқариш ишлари давом эттирилди. Бу ерда фуқаро муҳофазаси хизматлари, вилоят ФВ бошқармаси шахсий таркибининг бир-бирига мувофиқ оператив иш олиб бориши намойиш этилди. Ўзбекистон ҚЯОЖ Ғаллаорол туман бўлимининг  санитар дружинаси аъзолари  юқори даражада тайёргарликка эга эканлигини намойиш этдилар.

 

Машқлар доирасида тумандаги турли корхона ва муассасалар мутахассислари учун намунавий семинар ташкил этилди.Унда ФВга тайёрланиш ва у юз берганда хатти-ҳаракат қилиш, санитар дружиналар тузиш, уларни махсус кийим-кечак билан таъминлаш, биринчи ёрдам кўрсатиш кўникмаларини ўргатиш масалалари кўриб чиқилди. Машқларнинг сўнгги кунида Ғаллаорол тиббиёт коллежи ўқувчилари ва санитар дружиналари учун амалий семинар ташкил этилди. Унда қатнашганлар халқаро инсонпарварлик ҳуқуқи, Ўзбекистон ҚЯОЖ ривожланиш тарихи ва фаолияти тўғрисида батафсил маълумотларни олишди.

 

 

 

19 январ 2017 й.

 

Инсонпарварлик йўлида

 

2017 йил 19 январда Миллий Жамиятнинг Марказий офисида Ўзбекистон Қизил Ярим Ой Жамияти ва Халқаро Қизил Хоч Қўмитаси ўртасида ҳамкорлик тўғрисидаги  шартнома  имзоланди.

 

Яқин икки йил ичида ЎҚЯО Жамиятининг  ҳамкорлик ришталари ХҚХҚнинг Марказий Осиёдаги  Минтақавий ваколатхонасининг янги раҳбари жаноб Жан-Жером Касабьянка раҳбарлигида амалга оширилади.

 

Дастлаб Миллий Жамият ҳамда Халқаро Қизил Хоч Қўмитасининг Марказий Осиёдаги Минтақавий ваколатхонаси ўртасидаги самарали шерикчилик йилдан йилга мустаҳкамланаётгани таъкидланди.

 

Эслатиб ўтамиз, ХҚХҚ Ўзбекистонда Миллий Жамиятнинг салоҳиятини мустаҳкамлашга, Қизил Хоч ва Қизил Ярим Ой Халқаро ҳаракатининг Асосий тамойилларини юксалтиришга   кўмак бериб келмоқда. Шунингдек, Халқаро гуманитар ҳуқуқни тарғиб қилиш, фавқулодда вазиятларга тайёргарлик кўриш, жумладан, ахолини биринчи ёрдам кўрсатишга ўргатиш каби йўналишларда ҳамкорлик алоқалари йўлга қўйилган.

 

Мамлакатимиз Президенти томонидан “Халқ билан мулоқот ва инсон манфаатлари йили” деб эълон қилинган ушбу йилда имзоланган Келишув доирасида давлат ҳокимияти ва бошқарув органлари, ФВВ, таълим вазирликлари, ННТ, маҳалла фаоллари вакиллари иштирокида учрашувлар, семинарлар, илмий-амалий конференциялар, “давра суҳбатлари” ўтказиш режалаштирилган.

 

Келишувда маҳалла ва мактабларда аҳоли ва болаларни ФВда биринчи ёрдам кўрсатиш кўникмаларига ўргатиш, жиҳозлар харид қилиш, мактабларни   ФВда зарур бўлган  биринчи эҳтиёж материаллари билан таъминлашга қаратилган лойиҳаларни амалга ошириш кўзда тутилган. Ўзбекистон ҚЯОЖнинг Офатларга қарши Миллий тезкор жамоаси учун анъанавий дала машғулотлари ташкил этилади. Булардан ташқари, “Ёш қутқарувчи” командалари мусобақалари  ва санитар дружиналари учун биринчи ёрдам кўрсатишга ўргатиш бўйича тренинг ўтказилиши кўзда тутилган. Лойиҳани амалга ошириш доирасида вилоят ва туман ташкилотлари раҳбар ходимлари учун таълимга оид семинарлар ташкил этилади.

 

 

18 январ 2017 й.

Инсонпарварлик форуми

 

2017 йил 18 январ куни  Олмаота шаҳрида Марказий Осиёда табиий офатлар хавфини камайтиришнинг ҳуқуқий асосларига бағишланган Консультатив конференцияси бўлиб ўтди. Форум ишида Ўзбекистон Қизил Ярим Ой Жамиятининг делегацияси ҳам иштирок этди.

Ушбу форум  Халқаро Қизил Хоч ва Қизил Ярим Ой Жамиятлари Федерацияси  томонидан “ДИПЕКО-9” лойиҳасини амалга ошириш доирасида ташкил этилди. Маълумки, лойиҳа Европа Комиссиясининг Гуманитар Департаменти томонидан молиялаштириб келинмоқда.

 

Табиий офатларга муносабат кўрсатиш бўйича қонунчиликнинг миллий ва минтақавий даражада такомиллаштирилиши – конференциянинг муҳим  мақсад ва вазифалари қаторидан ўрин олди.  Шунингдек, тадбир  қатнашчилари минтақада табиий офатлар хавфини камайтиришга ёрдам беришда   тайёргарлик кўриш ва турли  соҳалардаги шериклар ўртасида  тажриба алмашиш, минтақавий ҳамкорликнинг ўрни масалаларини ҳам кўриб чиқдилар.

 

“Фавқулодда вазиятларда халқаро ёрдам кўрсатилишига ва дастлабки тиклаш ишларини амалга оширишда ёрдам кўрсатилишига кўмаклашиш ва уларни бошқариш тўғрисида”ги Қонунни илгари суришга оид ишлар ҳақида маърузалар тингланди. Ушбу ҳужжат Мустақил Давлатлар Ҳамдўстлигига аъзо мамлакатлар Парламентлараро Ассамблеяси томонидан қабул қилинган эди.        

 

Форумда Ўзбекистон Қизил Ярим Ой Жамиятининг вакиллари   ФВнинг олдини олиш ва уларни бартараф этишга оид амалга оширилаётган тадбирларга бағишланган тақдимотни ҳавола этишди. Учрашув давомида Мустақил Давлатлар Ҳамдўстлиги   Парламентлараро Ассамблеяси аъзолари томонидан махсус  меморандумга имзо чекилди.

 

 

4 январ 2017 й.

 

Ёш қутқарувчилар билим олишмоқда

 

Андижон вилоятида “Жамоа, мактаб ва институтларнинг фавқулодда вазиятларга қарши туриш қобилиятини мустаҳкамлаш йўли билан офатлар хавфини камайтиришга оид фаолиятни бирлаштириш ва кучайтириш” DIPECHO IX лойиҳаси амалга оширилмоқда.

 

Лойиҳанинг асосий мақсади – табиий офатлар юз берганда болаларни тўғри ҳаракатланишга тайёрлаш. Лойиҳага иштирок этиш учун Андижон шаҳридаги тўртта мактаб қамраб олинди. Уларда 7-синф ўқувчиларидан иборат “Ёш қутқарувчи” тўгараклари ташкил этилди. Қўлланмаларни тўлиқ ўзлаштириб олишлари учун ёш қутқарувчиларга 2 кунлик тренинг ташкил этилди. Бунда ўқувчилар ФВ юзага келган тақдирда биринчи ёрдам кўрсатиш бўйича назарий билимларни олдилар. Интерфаол машғулотларда эса улар аралаш кичик гуруҳларга бўлиниб олган холда билимларни амалда қўллашни ўргандилар. Энди бу мактабларнинг ўқитувчилари ва “Ёш қутқарувчи” тўгараклари аъзолари тренингда олган билимларини ўз ўртоқлари, таниш-билишлари ва қариндошлари билан ўртоқлашишлари мумкин. Лойиҳа доирасида умумтаълим мактаблар ФВ юзага келганда зарур бўлган техника ва жиҳозлар билан таъминлардилар. Таълим муассасаларида жадвалга мувофиқ ойига икки марта ташкил этилувчи эвакуацияга оид машғулотлар   фавқулодда вазиятларга янада яхшироқ тайёрланишга имкон беради.

 

 

Илғор тажрибани ўрганамиз.

 

Ушбу рукн остида    жойларда меҳнат қилаётган ходимларимизнинг  касб  маҳоратларини ошириш мақсадида  ўзининг бой тажрибасига эга бўлган ташкилотларимиз ҳақида ҳикоя қилиб борамиз.  Биринчи саҳифамизда Ўзбекистон Қизил Ярим Ой Жамияти Тошкент шаҳар ташкилоти фаолияти билан таништирамиз. 1991 йилдан бери ушбу ташкилотга Умида Қобуловна Мухамедова раҳбарлик қилиб келадилар. 

 

-Бугунги кундаги раҳбар ўз касбини ҳақиқий устаси бўлган, юртимизнинг ёруғ келажагига интилаётган, жамиятнинг фаолиятини чуқур тушунадиган, тахлил қилиш қобилиятига эга, меҳнатсеварлик фазилати, ўз кучи, салоҳиятига таянган холда қатъият билан ишлашга қодир бўлган, ўзининг юриш туриши, берилган вазифаларни сидқидилдан бажаришда коллективга ўрнак бўладиган инсон бўлмоғи даркор.

Яхши биласиз, барча юклатилган вазифаларни жамоа бажаради. Коллективимизда 40 дан зиёд ходимимиз фаолият юритади. Кўп йиллик тажрибага эга бўлган, ишини сидқидилдан севадиган инсонлар булар.  Ҳар бирини ўз ўрни бор. Биз битта жамоамиз, ҳар доим бир биримизни қўллаб қувватлаймиз.  Сан салоликка умуман йўл қўйилмайди. Кейин, ҳар бир мутахассис бемалол ҳамкасбини ишини эплай олади. Бу деган сўз бирор бир сабаб билан ходим ишга келолмаса, бошқа мутахассис уни ишини тўлдириб бораверади.

 

Ташкилотимиз кадрлар захирасига ҳам алохида эътибор берилади. Оммани ўз орқасидан эргаштира оладиган, сўзи ўткир, талабчан, меҳнатсевар, чинакам инсоний фазилатларга эга бўлган кадрлар билан  шакллантирилиб борилади. Ҳар бир мутахассисга давлат сиёсати қонунлари, давлат дастурлари, Жамиятнинг барча ҳужжатларини юксак даражада бажариш ёки бажаришда ҳисса қўшиш мезонлари ўргатиб борилади. Натижада Жамиятимиз тасарруфига олинадиган фуқароларнинг ижтимоий манфаатларини ҳимоялашни тўғри олиб бориб, ижтимоий шериклар билан мақсадли фаолият олиб боришга замин яратамиз.

 

Муҳим масала - йиллик, чорак иш режаларни, молиявий харажатлар режаларини тўла қонли исботи билан тузиб молиявий база яратишга эришаяпмиз. Шу бугунга қадар йиллик молиявий режамиз 110% бажарилди. Тинимсиз изланишлар, самарали мулоқотлар ўлароқ бу ишимиз изчил давом этмоқда.

 

Ишимизнинг натижаси яна бир нарса билан боғлиқ. Шаҳар худудидаги барча давлат ташкилотлари, улар қаторида соғлиқни сақлаш, халқ таълими, ФВ, ўрта махсус касб ҳунар  бошқармалари, хотин-қизлар қўмитаси, маҳалла жамоат фонди  билан шериклик шартномалари тузилиб, аниқ манзилли режалар ишлаб чиқилиши барча тизим билан ишлаш жараёнини енгиллаштираяпти.

 

Фаолиятимиз бешта асосий йўналишдан иборат. Улар барчаси инсон манфаатлари учун хизмат қилади. Шундай экан. ушбу ғоя  самарали амалга оширилиши  -  бизнинг инсонийлик фазилатларимизга, танлаган касбимизни сидқидилдан севиб, унга хизмат қилишимизга боғлиқдир.

 

 

ИСТЕЪДОД

 

Навои. У табиатан хушмуомала, доимо кулиб туради. Улғайиб энг олийжаноб касбни танлади – тиббиёт ҳамшираси бўлди. Юртдошлари Наргиза Эшбоевани сабрлилиги, ширин сўзлиги, юксак профессионал сифатлари учун ҳурмат қилишади. Ёш ҳамшира – биринчи ёрдам кўрсатиш қоидаларига ўргатиш бўйича Халқаро тренерлик сертификати соҳибидир.


Хатирчилик Муҳиддин Санаев ёрдам сўраб яна Наргизага қўнғироқ қилди. Қанд касаллиги узоқ йиллар мобайнида унинг организмини издан чиқарган, шунинг учун беморга тиббиёт ҳамширасининг ёрдами тез-тез зарур бўлиб туради.
 

- Наргиза - меҳрибон, эътиборли ва ажойиб инсон, - дейди Мухиддин ота. – Дунёда ана шундай оддий мулоқотга киришиш, ўз ташвишларингни гапириб бериш мумкин бўлган одамлар борлигидан жуда хурсандман. У бизнинг олдимизга тез-тез дори-дармон ва озиқ-овқат маҳсулотлари олиб келиб туради. Биздек қарияларга кўп нарса керак эмас, озгина эътибор кифоя – бошимиз осмонга етади.
 

Наргиза Эшбоева Кармана туманидаги “Камолот” маҳалласида туғилиб ўсди. Тиббиёт коллежини аъло баҳоларга тугатиб, вилоят ҚЯОЖга ишга қабул қилинди.
 

- Бугунги кунда 132 та якка-ёлғиз қариялар, ногиронлар, кўп болали ва кам таъминланган оилалар “Меҳр-шафқат” хизмати васийлигига олинган - ҳикоя қилади Наргиза. – Уларни ҳар бирининг ҳаёти билан яқиндан танишиб олганман. Қўлимдан келганича ёрдам бераман, муаммо туғилса, ечимини топишга харакат қиламан. Ахир, бу инсонлар бизнинг меҳримизга мухтож. Айниқса байрамлар арафасида ишимиз кўпаяди, ҳар бир оилага кириб боришга ҳаракат қиламиз.

 

Қишлоқдаги ҳар бир хонадон эгалари Наргизани энг яқин кадрдонига айланган, уларга меҳр улашишдан чарчамайди. Чунки у аллақачон ўз касбини танлаб олган.

 

 

2017 йил – Халқ билан мулоқот ва инсон манфаатлари йили 

Дилдан суҳбат

 

Давлат дастурини амалга ошириш доирасида ахборот бюллетенимизда янги рукн бошлаймиз. Унда Ўзбекистон ҚЯОЖ раҳбарлари ва мутахассислари инсонпарварлик фаолияти мавзусида ўз фикрларини баён этадилар. Биринчи меҳмонимиз – Самарқанд вилоят ташкилоти раиси Мунира Шерматовна  Арипова.

 

САВОЛ: Инсонпарварлик ташкилотидаги фаолият қайси томонлари  билан мухим?

М.Ш.АРИПОВА: Энг аввало у  ҳақиқий фидойиликни   талаб этади.  Ушбу ташкилотга бағри кенг, ўзгалар дардини яхши тушинадиган, бор куч -ғайратини эзгулик йўлида бахш  эта оладиган инсонлар меҳнат қилишлари керак, деб ўйлайман.  Бу фаолиятнинг энг мухим томониларидан бири - бизнинг кундалик меҳнатимиз замирида меҳр-мурруват туради, ҳар бир хонадон, ҳар бир кишининг  чинакам қадрдонга айланишимиз керак.

 

САВОЛ: Унинг раҳбари қандай хислатларга эга бўлиши керак?

М.Ш.АРИПОВА: Инсонпарвар ташкилотда ишлаш -  унга бор кучини сарфлашни ва ижодий ёндошувни талаб қилади. Унинг раҳбари   ҳаракатчан, мақсадга интилувчан, билимли, айни пайтда зийрак, эътиборли ҳамда атрофдагиларга намуна бўлиши керак. У ўз ходимларини ҳурмат қилиши лозим. Ўз-ўзини ташкиллаштириш ва тартиб, қўйилган мақсадга эришишга интилиш – раҳбар эга бўлиши зарур бўлган муҳим сифатлар бўлиб, кўпинча улар иш самарадорлигининг кўрсатгичлари ҳам саналади. Расмий шахс сифатида раҳбарнинг жамоат ташкилоти фаолиятини бошқарувчи норматив-ҳуқуқий ҳужжатларни билиши зарурлигини ҳам аҳамиятга эга деб биламан.

 

САВОЛ: Замон билан хамнафас бўлиш учун нима қилиш керак?

М.Ш.ОРИПОВА: Китоб мутоала қилиш. Президентимиз Ш.Мирзиёев имзо чеккан дастлабки ҳужжатлардан бири “Китоб маҳсулотларини чоп этиш ва тарқатиш тизимини ривожлантириш, ўқиш маданиятини ошириш ва тарғиб этиш бўйича комиссия тузиш тўғрисида”ги фармойиши бўлди. Бу тасодиф эмас. Чунки адабиёт бизга ёшлигимиздан йўлдош бўлади, дунёқарашимизни, фикрлаш ва ҳаёт тарзимизни вужудга келтиради. Унда бизни қизиқтирувчи барча масалаларнинг жавоби бор, уларнинг бир қисми биз доимо мурожаат қиладиган доимий китобларимизга айланиб қолади.  Яхши асар туфайли ҳамфикрлар вужудга келади,  замонавий адабиёт инсоннинг интеллектуал салоҳиятини мустахкамлайди. Улар бизга ҳаётдан ортга қолмасликни ўргатади, маънавий жиҳатдан бойитади, ишонч бағишлайди, тилимизни тўғрилайди, нутқимизни ривожлантиради.  Булар барчаси биз учун жуда мухим, чунки биз доимо инсонлар орасида бўламиз, уларга намуна бўлишимиз лозим.

 

ЭЪТИРОФ

 

Кириб келган янги йил Ўзбекистон Қизил Ярим Ой Жамияти учун  яхши хушхабар билан бошланди. Ўзбекистон ҚЯОЖ 50 та энг яхши Қизил Хоч ва Қизил Ярим Ой Миллий Жамиятлари орасида муносиб ўрин эгаллади. Ушбу кўрсатгич - Халқаро Қизил Хоч ва Қизил Ярим Ой Жамиятлари Федерацияси Минтақавий  ташкилотларни ривожлантириш Қўмитасининг дунёдаги мавжуд 190 Миллий Жамиятлар фаолиятини мониторинги натижасидир.

 

Миллий Жамиятлар рейтинги турли категориялар бўйича ХҚХ ва ҚЯОЖ Федерациясининг махсус комиссияси томонидан тасдиқланган қатор кўрсатгичлар асосида тузилади. Ушбу нуфузли ташкилот Қўмитаси раҳбари доктор Муктар Джалохнинг Ўзбекистон ҚЯОЖ раисига йўллаган расмий хатида таъкидланишича, бизнинг Жамиятимиз томонидан амалга оширилаётган гуманитар фаолият салоҳиятини ҳар томонлама ривожлантиришга йўналтирилган хатти-ҳаракатлар ва ўзгартиришлар самарали натижаларга эришишга ёрдам берган.

 

Шуни қайд этиб ўтиш керакки, Ўзбекистон ҚЯО Жамияти Халқаро Федерация томонидан эълон қилинган ахборот базаси рейтингига илк бор киритилди. Ушбу ижобий натижани аҳолига кўрсатилаётган ёрдам сифатини янада яхшилаш, барча йўналишларда амалга оширилаётган фаолиятимизни янада такомиллаштириш, келажакда Жамиятимизни муваффақиятли ва динамик ривожлантириш учун қўшимча рағбат сифатида қабул қилишимиз лозим.

 

 

<  1   2   3   4   5   6   7   8  >

 

© Ўзбекистон Қизил Ярим Ой Жамиати